‘अल्फाचा गल्ला 95 कोटींच्या उंबरठ्यावर

alpha निर्माता आदित्य चोप्रा यांचा बहुचर्चित ‘अल्फा’ हा चित्रपट सध्या चित्रपटगृहांमध्ये प्रदर्शित असून, सुरुवातीला बॉक्स ऑफिसवर अपेक्षेप्रमाणे प्रतिसाद न मिळाल्यानंतर आता त्याच्या कमाईने पुन्हा वेग घेतल्याचे दिसून येत आहे. दिग्दर्शक शिव रवैल यांच्या दिग्दर्शनाखाली साकारलेल्या या स्पाय-थ्रिलरला भारतासह परदेशी बाजारपेठेतही सुरुवातीला अपेक्षित यश मिळाले नव्हते. मात्र, प्रदर्शनाच्या 12व्या दिवशी झालेल्या जागतिक कमाईमुळे चित्रपटाने पुनरागमनाची चिन्हे दाखवली असून, त्याच्या एकूण कलेक्शनमध्ये लक्षणीय वाढ झाली आहे.

 

 

यशराज फिल्म्सच्या स्पाय युनिव्हर्सचा भाग असल्यामुळे ‘अल्फा’बाबत प्रेक्षकांमध्ये मोठी उत्सुकता होती. या चित्रपटात आलिया भट्ट, शर्वरी वाघ, अनिल कपूर आणि बॉबी देओल यांनी महत्त्वाच्या भूमिका साकारल्या आहेत. दमदार स्टारकास्ट असूनही चित्रपटाला कमाईच्या बाबतीत अपेक्षित यश मिळाले नाही. मात्र, प्रदर्शनाच्या 12व्या दिवशी चित्रपटाच्या कमाईत सुधारणा झाल्याचे चित्र समोर आले आहे.

सॅकनिल्कच्या अहवालानुसार, प्रदर्शनाच्या 11व्या दिवशी ‘अल्फा’ने जगभरात अंदाजे 1.50 कोटी रुपयांची कमाई केली होती. त्यानंतर 12व्या दिवशी, म्हणजेच दुसऱ्या मंगळवारी, या आकड्यात वाढ नोंदवली गेली असून चित्रपटाने सुमारे 2 कोटी रुपयांचे जागतिक कलेक्शन केले आहे. यामुळे ‘अल्फा’ची एकूण जागतिक कमाई आता जवळपास 95 कोटी रुपयांपर्यंत पोहोचली आहे. आगामी काही दिवसांतही अशीच कमाई कायम राहिल्यास तिसरा आठवडा संपण्यापूर्वीच हा चित्रपट 100 कोटी रुपयांच्या क्लबमध्ये प्रवेश करेल, असा अंदाज व्यक्त केला जात आहे. मात्र, लवकरच प्रदर्शित होणाऱ्या नव्या चित्रपटांमुळे ‘अल्फा’समोर स्पर्धा अधिक तीव्र होण्याची शक्यता आहे.

दरम्यान, यशराज फिल्म्सच्या स्पाय युनिव्हर्समधील ‘टायगर’, ‘वॉर’ आणि ‘पठाण’ या चित्रपटांनी बॉक्स ऑफिसवर मोठे यश मिळवले होते. मात्र, ‘अल्फा’ला त्या चित्रपटांप्रमाणे प्रेक्षकांचा प्रतिसाद आणि व्यावसायिक यश मिळवता आलेले नाही. आतापर्यंतच्या कामगिरीचा विचार करता, ‘अल्फा’ हा यशराज फिल्म्सच्या स्पाय युनिव्हर्समधील सर्वात कमी कमाई करणारा चित्रपट ठरण्याची शक्यता व्यक्त केली जात आहे.