राजकारणात ‘ऑपरेशन L’ची चर्चा

cm vijay देशाच्या राजकारणात सध्या आमदार आणि खासदारांच्या पक्षांतराच्या घडामोडींना वेग आला आहे. पक्षांतरबंदी कायद्यामुळे एखाद-दुसऱ्या आमदाराच्या पक्षबदलाऐवजी मोठा गट एकाचवेळी पक्षांतर करत असल्याचे चित्र अनेक ठिकाणी दिसून येत आहे. आता तामिळनाडूच्या राजकारणातही अशाच प्रकारच्या हालचाली सुरू असल्याची चर्चा असून, मात्र त्याचा पॅटर्न वेगळा असणार असल्याचे सांगितले जात आहे. मुख्यमंत्री थलपती विजय यांच्या नेतृत्वाखालील तमिलगा वेट्री कझगम (TVK) पक्ष लवकरच स्वबळावर बहुमताचा आकडा गाठू शकतो, असा दावा पक्षांतर्गत सूत्रांकडून केला जात आहे. राज्यातील सात विधानसभा जागा रिक्त झाल्यामुळे TVK आधीच बहुमताच्या जवळ पोहोचला असून, पक्षाच्या सूत्रांच्या माहितीनुसार ‘ऑपरेशन L’ अंतिम टप्प्यात आहे. एआयएडीएमकेचे सुमारे 10 आमदार लवकरच पक्ष बदलू शकतात आणि ही प्रक्रिया 15 ऑगस्टपर्यंत पूर्ण होण्याची शक्यता व्यक्त करण्यात येत आहे. दरम्यान, एआयएडीएमकेच्या आमदारांची संख्या 41 वर आली असून, पक्षातील अनेक आमदारांना त्यांच्या राजकीय भवितव्याची चिंता सतावत असल्याचेही सूत्रांनी सांगितले आहे.

 

 

TVKचे नेते आणि एआयएडीएमकेच्या काही आमदारांमध्ये सध्या चर्चेच्या फेऱ्या सुरू आहेत. या चर्चेशी संबंधित व्यक्तींनी दिलेल्या माहितीनुसार, विरोधी पक्षातील जवळपास 10 आमदार 15 ऑगस्टपूर्वी आपल्या विधानसभा सदस्यत्वाचा राजीनामा देऊन अधिकृतपणे TVKमध्ये प्रवेश करू शकतात. त्यानंतर संबंधित मतदारसंघांमध्ये पोटनिवडणुका होण्याची शक्यता असून, स्वातंत्र्यदिनापूर्वी ही संपूर्ण प्रक्रिया पूर्ण होऊ शकते

234 सदस्यांच्या तामिळनाडू विधानसभेत सध्या सात जागा रिक्त असल्यामुळे प्रभावी सदस्यसंख्या 227 इतकी आहे. TVKकडे सध्या 107 आमदार आहेत. एआयएडीएमकेचे माजी मंत्री सी. विजयभास्कर आणि एम. आर. विजयभास्कर यांनी आमदारकीचा राजीनामा देत TVKमध्ये प्रवेश केला आहे. त्याचप्रमाणे माजी मंत्री एम. एस. एम. आनंदन, एस. वलारमथी, पक्षाचे अनेक माजी आमदार आणि जिल्हास्तरीय पदाधिकाऱ्यांनीही TVKमध्ये प्रवेश केला आहे. जर आणखी 10 आमदारांनी राजीनामा दिला, तर विधानसभेची प्रभावी सदस्यसंख्या 217 वर येईल आणि अशा परिस्थितीत बहुमतासाठी 108 आमदारांची आवश्यकता असेल. दिनाकरण यांच्या पक्षाच्या एकमेव आमदाराचा पाठिंबा मिळाल्यास TVKचा आकडा 108 वर पोहोचू शकतो.

दरम्यान, ही प्रक्रिया केवळ पक्षांतरापुरती मर्यादित नसल्याचीही माहिती सूत्रांनी दिली आहे. TVK आणि एआयएडीएमकेच्या सूत्रांच्या माहितीनुसार, सी. व्ही. शनमुगम आणि एस. पी. वेलुमणी हे जुलैअखेर किंवा ऑगस्टच्या सुरुवातीला TVKमध्ये प्रवेश करू शकतात. आमदारकीचा राजीनामा देणाऱ्या नेत्यांना आगामी पोटनिवडणुकांमध्ये TVKकडून पुन्हा उमेदवारी दिली जाईल, असा विश्वास त्यांना देण्यात येत असल्याचे सांगितले जात आहे. तसेच, वरिष्ठ नेत्यांना पुन्हा निवडून आल्यानंतर राज्य मंत्रिमंडळात स्थान देण्याचे आश्वासनही देण्यात आल्याची माहिती सूत्रांकडून समोर आली आहे.