सगळ्यांच्या 'खाशाबा'कडे नजरा, पण मंजुळेंचा OTT वर धमाका!

nagraj manjule दिग्दर्शक नागराज मंजुळे यांचा बहुप्रतिक्षित ‘खाशाबा’ हा चित्रपट सध्या मोठ्या चर्चेत आहे. काही दिवसांपूर्वी प्रदर्शित झालेल्या या चित्रपटाच्या ट्रेलरने प्रेक्षकांची उत्सुकता शिगेला पोहोचवली असून, चित्रपटाकडून मोठ्या अपेक्षा व्यक्त केल्या जात आहेत. मात्र, ‘खाशाबा’च्या चर्चेदरम्यान नागराज मंजुळे यांनी ओटीटी विश्वातही आपली वेगळी छाप पाडली आहे.

 

 

नागराज मंजुळे यांचा ‘फ्रेम’ हा चित्रपट सध्या ओटीटीवर प्रेक्षकांची पसंती मिळवत असून, तो टॉप ट्रेंडिंग चित्रपटांच्या यादीत स्थान मिळवण्यात यशस्वी ठरला आहे. १० जुलै २०२६ रोजी या चित्रपटाचा प्रीमियर प्रदर्शित झाला. रिलीज झाल्यापासून ‘फ्रेम’ला प्रेक्षकांकडून सकारात्मक प्रतिसाद मिळत असून, तो ओटीटीवरील टॉप १० ट्रेंडिंग चित्रपटांच्या यादीत चौथ्या क्रमांकावर आहे.आशयघन कथा आणि प्रभावी अभिनयामुळे या चित्रपटाची सोशल मीडियावरही जोरदार चर्चा सुरू आहे. ‘फ्रेम’ हा केवळ मनोरंजन करणारा चित्रपट नसून, समाजातील अनेक गंभीर प्रश्नांवर भाष्य करणारा सामाजिक चित्रपट असल्याचे प्रेक्षकांकडून म्हटले जात आहे.व्यावसायिक जबाबदारी आणि माणुसकी यांच्यातील नाजूक सीमारेषेचा वेध हा चित्रपट घेतो. प्रत्येक प्रसंगातून नैतिक मूल्यांची कसोटी समोर येते आणि त्यातून निर्माण होणारे प्रश्न प्रेक्षकांना आत्मपरीक्षण करण्यास भाग पाडतात.

या चित्रपटाचे लेखन आणि दिग्दर्शन विक्रम पटवर्धन यांनी केले आहे. नागराज मंजुळे यांच्यासह अमेय वाघ, मुग्धा गोडसे आणि अक्षया गुरव यांनी चित्रपटात प्रमुख भूमिका साकारल्या आहेत. सर्वच कलाकारांनी आपल्या भूमिकांना योग्य न्याय दिल्याचे मत प्रेक्षकांकडून व्यक्त केले जात आहे.

‘फ्रेम’चा मध्यवर्ती विषय फोटो जर्नालिझमभोवती फिरतो. एखाद्या शोकांतिकेचे चित्रण करताना छायाचित्रकाराला कोणत्या भावनिक आणि नैतिक संघर्षातून जावे लागते, याचे वास्तववादी चित्रण या चित्रपटात करण्यात आले आहे. एखादी घटना कॅमेऱ्यात टिपणे आणि त्याच वेळी त्या घटनेतील माणुसकी जपणे, यामधील संघर्ष प्रभावीपणे मांडण्यात आला आहे.

चित्रपटाच्या शेवटाबाबतही सोशल मीडियावर मोठ्या प्रमाणात चर्चा होत आहे. ‘फ्रेम’चा शेवट प्रेक्षकांना अक्षरशः हादरवून सोडणारा असल्याच्या प्रतिक्रिया अनेकांनी दिल्या आहेत. शेवटचा ट्विस्ट आणि त्यातून निर्माण होणारे प्रश्न चित्रपट संपल्यानंतरही प्रेक्षकांच्या मनात कायम राहतात.

त्यामुळे ‘फ्रेम’ हा केवळ एकदा पाहून विसरून जाण्यासारखा चित्रपट नसून, विचार करायला लावणारा अनुभव असल्याच्या प्रतिक्रिया उमटत आहेत. हा चित्रपट मराठी ZEE5 या ओटीटी प्लॅटफॉर्मवर उपलब्ध असून, सध्या तो टॉप सिनेमांच्या यादीत चौथ्या क्रमांकावर ट्रेंड करत आहे.