एक धाव...अन् नाईट रायडर्सचा किताब! VIDEO

mlc-final : अमेरिकेत खेळल्या जाणाऱ्या फ्रँचायझी-आधारित टी२० लीग, मेजर क्रिकेट लीगच्या चौथ्या हंगामाचा अंतिम सामना १९ जुलै रोजी सकाळी ओकलंड स्टेडियमवर लॉस एंजेलिस नाइट रायडर्स आणि वॉशिंग्टन फ्रीडम संघ यांच्यात खेळला गेला, जो अत्यंत रोमांचक ठरला. अंतिम सामन्यात १६५ धावांचे लक्ष्य गाठताना, वॉशिंग्टन फ्रीडम संघाने १९ षटकांत १५१ धावा केल्या होत्या आणि शेवटच्या षटकात त्यांना विजयासाठी १४ धावांची गरज होती, परंतु ते केवळ १२ धावाच करू शकले आणि त्यांना एका धावेने पराभवाला सामोरे जावे लागले. अशाप्रकारे, लॉस एंजेलिस नाइट रायडर्सने प्रथमच मेजर लीग क्रिकेटचे विजेतेपद पटकावले.

 

 

 

 

 

 

एमएलसी अंतिम सामन्याच्या थरारक शेवटच्या षटकाबाबत बोलायचे झाल्यास, लॉस एंजेलिस नाइट रायडर्सकडून शॅडली व्हॅन शॅल्कविक गोलंदाजी करत होता, तर वॉशिंग्टन फ्रीडमकडून ओबास पिनाअर आणि लाहिरू मिलंथा फलंदाजी करत होते. पिनाअरने पहिल्याच चेंडूवर एक्स्ट्रा कव्हरच्या दिशेने षटकार मारला. यामुळे वॉशिंग्टन फ्रीडम संघाला पाच चेंडूंमध्ये विजयासाठी फक्त आठ धावांची गरज होती. शालक्विकने दुसऱ्याच चेंडूवर पिनारला त्रिफळाचीत करून पॅव्हेलियनमध्ये पाठवले. फलंदाजीला आलेला इयान हॉलंडही पहिल्याच चेंडूवर बाद झाला, त्यामुळे वॉशिंग्टन फ्रीडम संघाला शेवटच्या तीन चेंडूंमध्ये विजयासाठी आठ धावांची गरज होती. लॉकी फर्ग्युसनने चौथ्या चेंडूवर पॉइंट सीमारेषेच्या दिशेने चौकार मारला. षटकाच्या पाचव्या चेंडूवर फक्त एक धाव झाली, त्यामुळे शेवटच्या चेंडूवर विजयासाठी आणखी तीन धावांची गरज होती, पण लाहिरू मिलंथाला फक्त एकच धाव काढता आली आणि लॉस एंजेलिस नाइट रायडर्सने एका धावेने सामना जिंकला.

 

 

 

 

 

 

लॉस एंजेलिस नाइट रायडर्ससाठी हे छोटे लक्ष्य वाचवणे सोपे नव्हते, पण सुनील नरीन आणि कर्णधार जेसन होल्डर यांनी प्रत्येकी तीन बळी घेत उत्कृष्ट कामगिरी केली. नरीनने फलंदाजीत चांगली कामगिरी केली नाही, पण त्याने आपल्या चार षटकांत केवळ १३ धावा दिल्या आणि स्टीव्ह स्मिथ, रचिन रवींद्र व मिचेल ओवेन यांना बाद करण्यात महत्त्वाची भूमिका बजावली. जेसन होल्डरनेही या सामन्यात आपली ४०० वी टी२० विकेट पूर्ण केली आणि असा पराक्रम करणारा तो वेस्ट इंडिजचा चौथा खेळाडू ठरला.