‘रामायण’साठी साई पल्लवींची अनोखी तयारी

sai pallavi नवी दिल्ली येथे शनिवारी ‘प्रथम संकल्प’ या विशेष कार्यक्रमाने ‘रामायण: पार्ट 1’च्या प्रचार मोहिमेला सुरुवात झाली. या कार्यक्रमाला चित्रपटातील कलाकार आणि तंत्रज्ञांसह सिनेमा तसेच आध्यात्मिक क्षेत्रातील अनेक नामवंत व्यक्तींनी उपस्थिती लावली. यावेळी अभिनेता यशने बॉलिवूड अभिनेता रणबीर कपूरचे भरभरून कौतुक केले. त्याचबरोबर दिग्दर्शक नितेश तिवारी यांनीही चित्रपटातील सीतेची भूमिका साकारणाऱ्या साई पल्लवीचे विशेष कौतुक केले. या कार्यक्रमात साई पल्लवी यांनी माता सीतेची भूमिका साकारण्याचा अनुभव, त्यासाठी केलेली तयारी आणि जीवनशैलीत केलेल्या बदलांविषयी मनोगत व्यक्त केले.

 

 

‘रामायण’मध्ये सीतेची भूमिका साकारण्याबाबत बोलताना साई पल्लवी म्हणाल्या की, एखाद्या कलाकारासाठी अशा प्रकारची भूमिका मिळणे सोपे नसते, कारण देवीची भूमिका साकारणे ही मोठी जबाबदारी असते. त्यासाठी ही भूमिका सर्वोत्तम पद्धतीने साकारण्यासाठी पूर्ण समर्पणाने काम करणाऱ्या टीमची गरज असते. सीतेची भूमिका स्वीकारण्याचा निर्णय आपण स्वतः घेतला नाही, तर ही भूमिका मिळणे हे आपले भाग्य असल्याचे त्यांनी सांगितले.

“ही अशी गोष्ट नाही की ज्यासाठी तुम्ही प्रयत्न करता किंवा आधीच ठरवून ठेवता की मला ही भूमिका अशा प्रकारे साकारायची आहे. मी बसून ध्यान करायचे आणि म्हणायचे— सीता मां, तुम्ही माझ्यामार्फत अभिनय करा. माझ्यामार्फत जे काही घडेल, तेच तुम्हाला या चित्रपटासाठी हवे आहे,” असे साई पल्लवी यांनी सांगितले.

सीतेची भूमिका साकारताना स्वतःला शक्य तितके शुद्ध ठेवण्याचा प्रयत्न केल्याचेही साई पल्लवी यांनी स्पष्ट केले. “मी नेहमी स्वतःला शक्य तितके शुद्ध ठेवण्याचा प्रयत्न करत होते. किमान माझ्या विचारांमध्ये तरी, जेणेकरून सर्व काही तटस्थ राहील आणि मी त्या भूमिकेत माझे सर्वोत्तम रूप सादर करू शकेन,” असे त्या म्हणाल्या.दरम्यान, दिग्दर्शक नितेश तिवारी यांनी ‘रामायण’मध्ये राम आणि सीतेच्या भूमिका साकारणाऱ्या रणबीर कपूर आणि साई पल्लवी यांचे कौतुक केले. कलाकारांच्या डोळ्यांमधून त्यांची सत्यता आणि भाव व्यक्त होत असल्याचे त्यांनी सांगितले. “मला रणबीरच्या डोळ्यांत राम आणि साईच्या डोळ्यांत सीता दिसली. ज्या प्रामाणिकपणाचा मी शोध घेत होतो, तो मला या सुंदर व्यक्तींमध्ये मिळाला. मला साई आणि रणबीर दिसत नाहीत, तर चित्रपटात फक्त सीता आणि रामच दिसतात,” असे नितेश तिवारी यांनी म्हटले.