ज्येष्ठ पत्रकार तुळशीदास गोल्हर यांचे निधन

journalist Tulsidas Golhar passes away नागपूरच्या पत्रकारिता क्षेत्रासाठी अत्यंत दुःखद बातमी समोर आली आहे. नागपूर श्रमिक पत्रकार संघाचे माजी अध्यक्ष तसेच टिळक पत्रकार भवन ट्रस्टचे माजी अध्यक्ष, ज्येष्ठ पत्रकार तुळशीदास भगवंत गोल्हर यांचे गुरुवारी पहाटे दुःखद निधन झाले. मृत्युसमयी त्यांचे वय ८६ वर्षे होते. त्यांच्या निधनामुळे नागपूरसह संपूर्ण पत्रकारिता क्षेत्रात हळहळ व्यक्त होत असून, एक अनुभवी, अभ्यासू आणि तत्त्वनिष्ठ पत्रकार हरपल्याची भावना व्यक्त केली जात आहे.

 

 

 

मूळचे यवतमाळ जिल्ह्यातील माणिकवाडा (धनज), ता. नेरपरसोपंत येथील असलेल्या तुळशीदास गोल्हर यांनी पत्रकारितेच्या क्षेत्रात अनेक दशकांपर्यंत उल्लेखनीय कार्य केले. आपल्या निर्भीड लेखणी, स्पष्ट भूमिका आणि सामाजिक बांधिलकीमुळे त्यांनी पत्रकार विश्वात वेगळा ठसा उमटवला. पत्रकारितेतील निष्ठा आणि तत्त्वांशी तडजोड न करणारे व्यक्तिमत्त्व म्हणून त्यांची ओळख होती.नागपूर श्रमिक पत्रकार संघाचे अध्यक्ष आणि टिळक पत्रकार भवन ट्रस्टचे अध्यक्ष म्हणून त्यांनी पत्रकारांच्या हितासाठी सातत्याने काम केले. पत्रकारांच्या प्रश्नांवर आवाज उठवणे, संघटनात्मक बळकटीसाठी प्रयत्न करणे आणि पत्रकारितेच्या मूल्यांचे जतन करणे यासाठी त्यांचे योगदान विशेष मानले जाते.

 

 

तुळशीदास गोल्हर यांच्या पार्थिवावर आज, २ जुलै रोजी सायंकाळी ४.३० वाजता अंबाझरी घाट, नागपूर येथे अंत्यसंस्कार करण्यात येणार आहेत. त्यांच्या पश्चात कुटुंबीय, नातेवाईक, मित्रपरिवार तसेच मोठा आप्तपरिवार आहे. त्यांच्या निधनाने नागपूरच्या पत्रकारिता क्षेत्रातील एक ज्येष्ठ, अनुभवी आणि मार्गदर्शक व्यक्तिमत्त्व काळाच्या पडद्याआड गेले आहे. विविध स्तरांतून त्यांना भावपूर्ण श्रद्धांजली अर्पण करण्यात येत आहे.