पीजीमध्ये गॅसगळतीनंतर स्फोट; ८ मजूर भाजले!

explosion-after-gas-leak : कर्नाटकची राजधानी बंगळुरूच्या वेशीवर असलेल्या बोम्मासंद्रा भागात गुरुवारी सकाळी एक अतिशय भीषण दुर्घटना घडली. कामगारांच्या एका भाडोत्री वसतिगृहात (पेईंग गेस्ट) संशयास्पद वायू गळतीमुळे अचानक जोरदार स्फोट झाला. या स्फोटात पश्चिम बंगालमधील ८ कामगार गंभीररीत्या भाजले आहेत. स्फोट झाल्यानंतर खोलीत क्षणात मोठा अग्नितांडव माजला.

 

 

 

 

 

ही घटना हेब्बागोडी पोलीस ठाण्याच्या हद्दीतील आणेकल तालुक्यातील बोम्मासंद्रा येथे घडली. एका इमारतीतील दुसऱ्या मजल्यावर असलेल्या खोलीत हा अपघात झाला.

 

 

प्राथमिक तपासानुसार, रात्रीच्या वेळी खोलीत रंधनाचा वायू (गॅस) गळती होत असावी. सकाळी उठल्यानंतर एका कामगाराने जशी खोलीतील विजेचा दिवा लावण्यासाठीची कळ (स्विच) दाबली, तशी ठिणगी पडून जोरदार स्फोट झाला. स्फोटाचा प्रभाव इतका तीव्र होता की आग क्षणात त्या मजल्यावरील इतर खोल्यांमध्ये पसरली.

 

 

स्फोटाच्या भीषण आवाजाने परिसरात एकच खळबळ उडाली आणि नागरिकांमध्ये भीतीचे वातावरण निर्माण झाले. घटनेची माहिती मिळताच पोलीस आणि अग्निशामक दलाच्या गाड्या घटनास्थळी दाखल झाल्या. अग्निशमन दलाच्या जवानांनी अथक प्रयत्नांनंतर आगीवर पूर्णपणे नियंत्रण मिळवले.

 

भाजलेल्या आठही कामगारांना तातडीने जवळच्या रुग्णालयात दाखल करण्यात आले असून त्यांच्यावर उपचार सुरू आहेत. हे सर्व कामगार पश्चिम बंगालचे रहिवासी असून रोजगारासाठी येथे राहत होते.

 

 

ज्या इमारतीत ही दुर्घटना घडली ते १८ खोल्यांचे निवासस्थान नागराज रेड्डी नावाच्या व्यक्तीचे आहे. त्यांनी ही जागा भाडेतत्त्वावर दिली होती आणि लिंगराजू नावाची व्यक्ती ते वसतिगृह चालवत होती. निष्काळजीपणा दाखवल्याप्रकरणी हेब्बागोडी पोलिसांनी मूळ मालक नागराज रेड्डी आणि चालक लिंगराजू यांच्याविरोधात गुन्हा दाखल केला आहे. स्फोटाचे नेमके कारण शोधण्यासाठी पोलीस आणि वैज्ञानिक तपास पथक अधिक चौकशी करत आहे.