आरोपीच्या हस्ताक्षरांमधून उलगडणार नीट पेपरफुटीचे रहस्य?

neet-ug-paper-leak-case : वैद्यकीय पदवी प्रवेशासाठी घेण्यात आलेल्या राष्ट्रीय पात्रता व प्रवेश परीक्षेतील (नीट) प्रश्नपत्रिका फुटी आणि गैरव्यवहार प्रकरणी केंद्रीय तपास यंत्रणेला (सीबीआय) मोठा दिलासा मिळाला आहे. या प्रकरणातील मुख्य आरोपींचे हस्ताक्षराचे नवीन नमुने घेण्याची परवानगी विशेष न्यायालयाने तपास यंत्रणेला दिली आहे.

 

 

 

 

तपास अधिकाऱ्यांनी न्यायालयात सादर केलेल्या अर्जात स्पष्ट केले होते की, जप्त केलेले संशयास्पद दस्तऐवज, हस्तलिखीत उत्तरे आणि प्रश्नपत्रिकांचे उत्तरतक्ते यांची फॉरेन्सिक सायन्स प्रयोगशाळेत अचूक तपासणी करण्यासाठी आरोपींच्या हस्ताक्षराचे आणि स्वाक्षरीचे ताजे नमुने अत्यंत आवश्यक आहेत. यापूर्वी घेतलेले नमुने तांत्रिक कारणांमुळे अपुरे पडत असल्याने ही मागणी करण्यात आली होती.

न्यायालयाने दोन्ही बाजूंचा युक्तिवाद ऐकून घेतल्यानंतर केंद्रीय तपास यंत्रणेची मागणी रास्त मानत ती मंजूर केली. त्यानुसार, आता कारागृहात बंदिस्त असलेल्या तसेच जामिनावर असलेल्या आरोपींच्या उपस्थितीत कायदेशीर प्रक्रियेचे पालन करून हस्ताक्षराचे नमुने गोळा केले जातील.

प्रश्नपत्रिका फुटीच्या या रॅकेटमध्ये सहभागी असलेल्या दलालांनी आणि आरोपींनी विद्यार्थ्यांना पुरवलेले उत्तरतक्ते आणि हस्तलिखीत कागदपत्रे ही खरोखरच संबंधित आरोपींनीच लिहिली होती का, हे सिद्ध करण्यासाठी हस्ताक्षराची ही तपासणी सर्वात महत्त्वाचा पुरावा ठरणार आहे. या निर्णयामुळे सीबीआयच्या तपासाला अधिक गती मिळणार असून न्यायालयात भक्कम पुरावे सादर करण्यास मदत होणार आहे.