शब्दांची ताकद दाखवणारा सूरज इंजिनिअरच्या संदेशाला सोनाक्षीचा ‘होकार’
Total Views |
मुंबई
sonakshi sinha देशभरात शैक्षणिक प्रश्नांवर सुरू असलेल्या आंदोलनांच्या पार्श्वभूमीवर मुंबईतील अभियंता सूरज साधना विलास जाधव याने व्यक्त केलेल्या भावना सध्या सोशल मीडियावर चर्चेचा विषय ठरत आहेत. समाजातील महत्त्वाच्या प्रश्नांवर प्रत्येक नागरिकाने आपली भूमिका मांडणे आवश्यक आहे, असा संदेश देणारा सूरजचा व्हिडिओ अनेकांच्या पसंतीस उतरला आहे. विशेष म्हणजे, बॉलिवूड अभिनेत्री सोनाक्षी सिन्हानेही सूरजच्या विचारांना पाठिंबा दर्शवत आपल्या फेसबुक अकाउंटवर एक जुना व्हिडिओ डब करून शेअर केला आहे. या व्हिडिओच्या माध्यमातून तिने सूरजने मांडलेल्या भूमिकेशी सहमती व्यक्त केली आहे.
सूरज जाधवने आपल्या व्हिडिओच्या सुरुवातीलाच, “मी एक कलाकार आहे. मी संहिता (स्क्रिप्ट्स) वाचतो; त्यामुळे अशा प्रकारे मी माझे योगदान देणार आहे,” असे सांगत आपली भूमिका स्पष्ट केली. त्यानंतर त्याने नागरिक म्हणून प्रत्येक व्यक्तीची सामाजिक जबाबदारी अधोरेखित केली.
आपल्या भावनिक संदेशात सूरज म्हणाला की, देशाचा प्रौढ नागरिक म्हणून महत्त्वाच्या विषयांवर आवाज उठवणे ही प्रत्येकाची जबाबदारी आहे. एखाद्या प्रश्नाचा थेट परिणाम आपल्यावर होत नसला तरी अन्यायाविरोधात बोलणे गरजेचे आहे. केवळ एखाद्या समस्येचा सामना आपल्याला करावा लागत नाही म्हणून त्याकडे दुर्लक्ष करणे हे स्वार्थीपणाचे लक्षण असल्याचे त्याने म्हटले. कारण भविष्यात कदाचित आपल्यालाही इतरांच्या मदतीची आणि पाठिंब्याची आवश्यकता भासू शकते, असे त्याने नमूद केले.
समाजात आपल्यासारखाच विचार करणारे अनेक लोक आहेत, मात्र प्रत्येकालाच आपल्या भावना प्रभावीपणे शब्दांत मांडता येतात असे नाही. त्यामुळे अशा लोकांच्या मनातील भावना व्यक्त करण्यासाठी आपण हा व्हिडिओ तयार केल्याचे सूरजने सांगितले. लोकांना त्यांच्या विचारांना अभिव्यक्ती मिळावी, हीच या प्रयत्नामागची भावना असल्याचे त्याने स्पष्ट केले.
“शब्दांमध्ये मोठी ताकद असते. मी कोणताही नवीन संदेश तयार केलेला नाही, तर आधीपासून अस्तित्वात असलेल्या एका विचाराला माझ्या आवाजातून अभिव्यक्त करण्याचा प्रयत्न केला आहे,” असेही सूरजने आपल्या व्हिडिओमध्ये म्हटले आहे.
दरम्यान, अभिनेत्री सोनाक्षी सिन्हाने सूरजच्या या संदेशाला पाठिंबा देत फेसबुकवर एक जुना व्हिडिओ डब करून शेअर केला आहे. या माध्यमातून नागरिकांनी सामाजिक प्रश्नांबाबत संवेदनशील राहणे, अन्यायाविरोधात आवाज उठवणे आणि लोकशाही मूल्यांच्या जतनासाठी सक्रिय सहभाग घेणे किती महत्त्वाचे आहे, हे अधोरेखित करण्याचा प्रयत्न तिने केला आहे.
शैक्षणिक प्रश्नांवरील आंदोलनांच्या पार्श्वभूमीवर सूरज जाधवने मांडलेली भूमिका आणि त्याला मिळालेला सोनाक्षी सिन्हाचा पाठिंबा यामुळे हा व्हिडिओ सोशल मीडियावर मोठ्या प्रमाणात चर्चेत आला आहे.