सात दिवसांनंतर वैष्णो देवी यात्रा पुन्हा सुरू; ‘जय माता दी’च्या जयघोषात भाविकांचा प्रवास सुरू

vaishno devi pilgrimage खराब हवामान आणि सुरक्षेच्या कारणास्तव गेल्या आठवडाभरापासून स्थगित करण्यात आलेली श्री माता वैष्णो देवी यात्रा अखेर शनिवारी पुन्हा सुरू झाली. हवामानात काही प्रमाणात सुधारणा झाल्यानंतर श्री माता वैष्णो देवी तीर्थक्षेत्र मंडळाने सकाळी सुमारे ७ वाजता यात्रेला परवानगी दिली. यात्रा पुन्हा सुरू झाल्याची माहिती मिळताच देशभरातून कटरा येथे आलेल्या भाविकांमध्ये उत्साहाचे वातावरण निर्माण झाले.

 

 

 

 

यात्रा सुरू होताच नोंदणी केंद्रांवर भाविकांची मोठी गर्दी झाली. मात्र, सकाळी साडेआठच्या सुमारास अचानक मुसळधार पावसाला सुरुवात झाल्याने सुरक्षेच्या कारणास्तव नोंदणी प्रक्रिया तात्पुरती थांबवण्यात आली. सुमारे दीड तास नोंदणी बंद असतानाही भाविकांनी संयम राखत केंद्रांबाहेर प्रतीक्षा केली.

सकाळी १० वाजण्याच्या सुमारास पावसाचा जोर कमी झाल्यानंतर नोंदणी प्रक्रिया पुन्हा सुरू करण्यात आली. त्यानंतर ‘जय माता दी’च्या जयघोषात भाविकांनी नोंदणी पूर्ण केली आणि कुटुंबीयांसह माता वैष्णो देवीच्या दर्शनासाठी पारंपरिक मार्गाने प्रस्थान केले.

सध्या भाविकांना केवळ पारंपरिक मार्गानेच यात्रा करण्याची परवानगी देण्यात आली आहे. सुरक्षेच्या कारणास्तव बॅटरी कार मार्ग आणि ताराकोट मार्ग अद्याप बंद ठेवण्यात आले आहेत. या दोन्ही मार्गांवर स्वच्छता तसेच आवश्यक दुरुस्तीची कामे सुरू आहेत. हवामानाची परिस्थिती पूर्णपणे सामान्य झाल्यानंतरच हे मार्ग पुन्हा सुरू करण्याबाबत निर्णय घेतला जाणार आहे.

यात्रेकरूंच्या सुरक्षेसाठी प्रशासनानेही व्यापक व्यवस्था केली आहे. एसडीआरएफ, आपत्ती व्यवस्थापन पथक, सीआयएसएफ, जम्मू-काश्मीर पोलीस, सीआरपीएफ तसेच श्राइन बोर्डाचे अधिकारी आणि कर्मचारी यात्रा मार्गावरील विविध ठिकाणी तैनात करण्यात आले आहेत. हवामानातील बदलांवर प्रशासनाकडून सातत्याने लक्ष ठेवले जात आहे. vaishno devi pilgrimage दरम्यान, त्रिकुटा पर्वतरांगांमध्ये अद्याप ढगाळ वातावरण असून काही ठिकाणी अधूनमधून पाऊस पडत आहे. त्यामुळे यात्रेकरूंनी प्रशासनाच्या मार्गदर्शक सूचनांचे पालन करून सावधगिरीने प्रवास करण्याचे आवाहन करण्यात आले आहे.

सुमारे आठवडाभरानंतर यात्रा पुन्हा सुरू झाल्याने कटरा परिसरात भाविकांमध्ये मोठा उत्साह पाहायला मिळाला. कपाळावर ‘जय माता दी’च्या पट्ट्या, हातात काठ्या आणि अंगावर रेनकोट अशा स्वरूपात भाविक श्रद्धा आणि उत्साहाने माता वैष्णो देवीच्या दर्शनासाठी मार्गस्थ होताना दिसले.