परीक्षा सुधारणांसाठी मोदींचा मोठा ‘मास्टर प्लॅन’!
Total Views |
नवी दिल्ली,
pm-modi : देशातील विविध स्पर्धा परीक्षांमध्ये होणाऱ्या प्रश्नपत्रिका फुटीच्या घटनांना आणि गैरप्रकारांना आळा घालण्यासाठी पंतप्रधान नरेंद्र मोदी यांनी एक अत्यंत महत्त्वपूर्ण निर्णय घेतला आहे. परीक्षा पद्धती अधिक पारदर्शक, विश्वासार्ह आणि आधुनिक तंत्रज्ञानावर आधारित बनवण्यासाठी इन्फोसिसचे सह-संस्थापक नंदन निलेकणी यांच्या नेतृत्वाखाली एका उच्चस्तरीय कार्यगटाची (टास्क फोर्स) स्थापना करण्यात आली आहे.
तंत्रज्ञानाचा होणार प्रभावी वापर
या संदर्भात बोलताना पंतप्रधान मोदी यांनी सांगितले की, स्पर्धा परीक्षांमधील गैरप्रकारांमुळे विद्यार्थ्यांच्या विश्वासाला तडा जातो. हा विश्वास पुन्हा संपादन करण्यासाठी आधुनिक तंत्रज्ञान हे एक प्रभावी साधन ठरू शकते. हा नवीन कार्यगट देशातील सार्वजनिक परीक्षांची संपूर्ण प्रक्रिया डिजिटल तंत्रज्ञानाच्या साहाय्याने अधिक सुरक्षित आणि पारदर्शक बनवण्यासाठी काम करेल, जेणेकरून प्रश्नपत्रिका फुटण्यासारख्या प्रकारांना पूर्णपणे आळा बसेल.
कडक कायद्याची तयारी
परीक्षा पद्धतीत सुधारणा करण्यासोबतच, प्रश्नपत्रिका फोडणाऱ्यांवर आणि गैरप्रकार करणाऱ्यांवर कठोर कारवाई करण्यासाठी सरकार संसदेत एक नवीन विधेयक आणण्याच्या तयारीत आहे. या कायद्यांतर्गत दोषींना कठोर शिक्षेची आणि मोठ्या दंडाची तरतूद केली जाणार आहे.
डिजिटल क्षेत्रातील महत्त्वाचा अनुभव
भारताच्या डिजिटल सार्वजनिक पायाभूत सुविधांच्या (डिजिटल पब्लिक इन्फ्रास्ट्रक्चर) उभारणीत नंदन निलेकणी यांनी मोलाचे योगदान दिले आहे. आता त्यांच्या या समृद्ध अनुभवाचा वापर देशातील शिक्षण आणि परीक्षा पद्धतीला अधिक मजबूत व सुरक्षित करण्यासाठी केला जाणार आहे.