तेज प्रताप यादव यांना 14 दिवसांची न्यायालयीन कोठडी

Tej Pratap Yadav राष्ट्रीय जनता दलाचे (RJD) प्रमुख लालू प्रसाद यादव यांचे ज्येष्ठ पुत्र तेज प्रताप यादव यांना 14 दिवसांच्या न्यायालयीन कोठडीत पाठवण्यात आले आहे. पटना पोलिसांनी शनिवारी संध्याकाळी डाक बंगला चौकाजवळील एका मॉलमधून तेज प्रताप यादव यांना अटक केली होती. त्यानंतर पोलिसांनी त्यांना दीघा पोलीस ठाण्यात नेले. शनिवारी उशिरा रात्री त्यांना न्यायालयीन दंडाधिकाऱ्यांसमोर हजर करण्यात आले, जिथून न्यायालयाने त्यांना 14 दिवसांची न्यायालयीन कोठडी सुनावत बेऊर कारागृहात पाठवण्याचे आदेश दिले.

 

 

बिहार बंदच्या आवाहनादरम्यान तेज प्रताप यादव हे आंदोलकांसोबत रस्त्यावर उतरले होते. या प्रकरणी त्यांच्याविरोधात गांधी मैदान पोलीस ठाण्यात एफआयआर दाखल करण्यात आला आहे. याच प्रकरणात पटना पोलिसांनी डाक बंगला चौकाजवळील सेंट्रल मॉलमधून त्यांना ताब्यात घेत दीघा पोलीस ठाण्यात नेले.

दरम्यान, तेज प्रताप यादव यांच्या समर्थकांनी यापूर्वी पटना पोलिसांवर गंभीर आरोप केले होते. तेज प्रताप यांच्याबाबत कोणतीही माहिती दिली जात नसल्याचे आणि त्यांना कोणत्या आरोपाखाली पोलीस ठाण्यात ठेवण्यात आले आहे, हेही सांगितले जात नसल्याचे समर्थकांनी म्हटले होते.तेज प्रताप यादव यांचे वकील जगन्नाथ सिंह यांनी सांगितले की, सोमवारी त्यांच्या जामिनासाठी न्यायालयात अर्ज दाखल करण्यात येणार आहे.यापूर्वी शनिवारी दुपारीही पटना पोलिसांनी तेज प्रताप यादव यांना ताब्यात घेतले होते. पटना येथील रामगुलाम चौक आणि गांधी मैदान परिसरात विद्यार्थ्यांनी आंदोलन केले होते. या आंदोलनात सहभागी विद्यार्थ्यांसोबत तेज प्रताप Tej Pratap Yadav  यादवही सहभागी झाले होते. त्यावेळी बिहार पोलिसांनी त्यांना पकडून पोलीस वाहनातून सोबत नेले होते.ताब्यात घेतल्यानंतर तेज प्रताप यादव यांनी प्रतिक्रिया देताना, “मी विद्यार्थ्यांसोबत उभा आहे आणि त्यांच्यासाठी मरण्यासही तयार आहे,” असे म्हटले होते. या आंदोलनादरम्यान अनेक ठिकाणी विद्यार्थी आणि पोलिसांमध्ये संघर्ष झाल्याचेही समोर आले होते.

मात्र, पोलिसांनी ताब्यात घेतल्यानंतर काही वेळातच तेज प्रताप यादव यांना सोडून दिले होते. त्यानंतर ते एका मॉलमध्ये गेले असता पोलिसांनी पुन्हा कारवाई करत त्यांना अटक केली. आता न्यायालयाच्या आदेशानुसार त्यांची रवानगी बेऊर कारागृहात करण्यात आली आहे.