‘या’ ३ ठिकाणी सतत खाज? शरीर देतंय गंभीर आजाराचा इशारा!

your body is signaling a serious illness शरीरावर अधूनमधून खाज येणे ही सामान्य बाब असू शकते. मात्र, एखाद्या विशिष्ट भागावर दीर्घकाळ सतत खाज येत असेल, तर त्याकडे दुर्लक्ष करणे धोकादायक ठरू शकते. शरीराच्या काही भागांवर वारंवार होणारी खाज ही अंतर्गत आरोग्याशी संबंधित समस्येचा संकेत असू शकते. डॉक्टर सलीम झैदी यांनी त्यांच्या यूट्यूब व्हिडिओमध्ये अशा तीन भागांबाबत माहिती दिली आहे, जिथे सतत खाज येत असल्यास वैद्यकीय सल्ला घेणे गरजेचे ठरू शकते.

 

 

रात्रीच्या वेळी तळहात आणि तळपायांना तीव्र खाज येत असेल, तर याकडे विशेष लक्ष देणे आवश्यक आहे. डॉक्टरांच्या मते, हे कोलेस्टॅसिस किंवा रक्तामध्ये पित्त आम्ल साचण्यासारख्या यकृताशी संबंधित समस्यांचे लक्षण असू शकते. यकृताच्या कार्यक्षमतेवर परिणाम झाल्यास तळहात आणि तळपायांवर खाज वाढू शकते. यासोबत डोळे पिवळे पडणे, प्रचंड थकवा किंवा पोटाच्या उजव्या बाजूला वेदना जाणवत असल्यास डॉक्टरांचा सल्ला घेऊन एलएफटी (LFT) चाचणी करून घेणे आवश्यक आहे.

 

संध्याकाळच्या वेळी, विशेषतः बराच वेळ उभे राहिल्यानंतर पोटऱ्या आणि घोट्यांवर तीव्र खाज येत असेल, तर त्यामागे रक्तातील साखरेची वाढ किंवा पायांच्या शिरांशी संबंधित समस्या असू शकते. रक्तातील साखर वाढल्याने त्वचा कोरडी पडून खाज येऊ शकते. तसेच पायांच्या शिरा कमकुवत झाल्यास रक्ताचा प्रवाह प्रभावित होऊन पायांमध्ये रक्त साचू शकते. त्यामुळे त्या भागात अस्वस्थता आणि तीव्र खाज जाणवू शकते.

 

पाठीवर आणि दंडांवर सातत्याने खाज येत असल्यासही सावध राहण्याचा सल्ला दिला जातो. हे मूत्रपिंडांच्या कार्यक्षमतेशी संबंधित असू शकते. मूत्रपिंडे दररोज सुमारे १८० लिटर रक्त गाळण्याचे काम करतात. मात्र, मूत्रपिंडांची कार्यक्षमता कमी झाल्यास रक्तामध्ये फॉस्फरसचे प्रमाण वाढू शकते आणि त्यामुळे त्वचेखाली खाज निर्माण होण्याची समस्या वाढू शकते. शरीरावर सतत खाज येत असल्यास स्वतःहून औषधे घेण्याऐवजी त्यामागचे कारण जाणून घेणे महत्त्वाचे आहे. विशेषतः खाज दीर्घकाळ कायम राहिल्यास किंवा त्यासोबत इतर लक्षणे दिसत असल्यास डॉक्टरांचा सल्ला घेणे आवश्यक आहे.