रंग शारदा हॉटेलसह भूखंड जप्त
पाचशे कोटींच्या घोटाळयात ईडीची कारवाई
Total Views |
मुंबई
ed अंमलबजावणी संचालनालयाने (ईडी) ५०० कोटी रुपयांहून अधिक रकमेच्या मनी लाँड्रिंग प्रकरणात मुंबईतील वांद्रे येथील प्रसिद्ध रंग शारदा हॉटेल आणि प्रभादेवी येथील एक भूखंड जप्त केला. जप्त केलेल्या मालमत्तेचे एकूण मूल्य अंदाजे ३३२ कोटी रुपये आहे. या प्रकरणात अंदाजे ५१२ कोटी रुपये बेकायदेशीरपणे कमावले गेल्याचा दावा ईडीने केला आहे. प्रभुदास वीरचंद लोटिया आणि इतरांनी केलेल्या गैरव्यवहार प्रकरणात कारवाईचा भाग म्हणून ही मालमत्ता जप्त करण्यात आली.
हे प्रकरण, मराठी नाटक, साहित्य आणि सांस्कृतिक उपक्रमांना प्रोत्साहन देण्यासाठी महाराष्ट्र गृहनिर्माण आणि क्षेत्र विकास प्राधिकरणाने (म्हाडा) रंग शारदा प्रतिष्ठान ट्रस्टला सवलतीच्या दरात वाटप केलेल्या जमिनीशी संबंधित आहे. ईडीच्या एका अधिकाऱ्याने सांगितले की, ज्या उद्देशाने ही जमीन हस्तांतरित करण्यात आली, तो हेतू साध्य झाला नाही. जमीन वाटपाच्या अटींचे उल्लंघन करून जमिनीचा मोठ्या प्रमाणावर व्यावसायिक कारणांसाठी वापर करण्यात आला आणि मोठा आर्थिक फायदा मिळवण्यात आला. रंग शारदा प्रतिष्ठान ट्रस्टच्या विश्वस्तांनी वांद्रे पोलिस ठाण्यात दाखल केलेल्या एफआयआरच्या आधारे तपास सुरू केला. या तक्रारीत प्रभुदास वीरचंद लोटिया आणि रंग शारदा हॉटेल्स प्रायव्हेट लिमिटेड यांच्यावर फसवणुकीचा आरोप करण्यात आला होता. या एफआयआरच्या आधारे, ईडीने मनी लाँड्रिंगचा गुन्हा दाखल करून तपास सुरू केला.
नाट्यगृहाऐवजी दारूचे दुकान केले सुरू
लोटिया यांनी रंग शारदा हॉटेल्स प्रायव्हेट लिमिटेडमार्फत ट्रस्टला वाटप केलेल्या जमिनीवर बेकायदेशीरपणे ताबा मिळवला होता. त्यानंतर, सरकारी मंजुरी आणि जमीन वाटपाच्या अटींकडे दुर्लक्ष करून संपूर्ण संकुलाचा वापर व्यावसायिक कारणांसाठी करण्यात आला. करारानुसार कंपनीने एक नाट्यगृह आणि कलाकारांसाठी निवासस्थान बांधून ते ट्रस्टकडे सुपूर्द करणे अपेक्षित होते, परंतु तसे करण्यात आले नाही. त्याऐवजी, त्या जागेवर हॉटेल्स, लॉजिंग रूम्स, रेस्टॉरंट्स, दारूची दुकाने, विवाह सभागृहे आणि इतर व्यावसायिक आस्थापने चालवण्यात आली. व्यावसायिक उपक्रमांमधून अंदाजे ५१२ कोटींचा अवैध नफा कमावला गेला.