पत्रकारितेतील भीष्म पितामह लक्ष्मणराव जोशी कालवश

laxmanrao-joshi : पत्रकारितेच्या क्षेत्रातील तपस्वी व दैनिक तरुण भारतचे माजी मुख्य संपादक आणि प्रबंध संचालक, राजकीय-सामाजिक विषयांचे विश्लेषक आणि नि:स्पृह व्यक्तिमत्त्वाचे धनी लक्ष्मण त्र्यंबक जोशी यांचे मंगळवार, २८ जुलै रोजी दुपारी २ वाजता देवनगर येथील खाजगी रुग्णालयात निधन झाले. ते ८९ वर्षांचे होते. त्यांच्या पश्चात पत्नी ऊर्मिला, तसेच अंजली प्रकाश मुळावकर व देवयानी संदीप भोपे या कन्या, नातवंडे आणि बराच मोठा आप्तपरिवार आहे.

 

 

 

 

 

मूळ पाथर्डी (ता. तेल्हारा) येथील असलेल्या लक्ष्मणरावांनी १९६७ साली दै. तरुण भारतमधू्न पत्रकारितेला प्रारंभ केला. त्याआधी पाच वर्षे त्यांनी भिकमचंद खंडेलवाल विद्यालयात शिक्षक म्हणून कार्य केले. पत्रकारितेतील सर्वाधिक काळ त्यांनी ‘तरुण भारत’मध्ये व्यतीत केला. त्यानंतर गोमंतक, गोवादूत, जळगाव तरुण भारत, मुंबई तरुण भारत येथेही त्यांनी संपादकपद भूषविले. नागपूरच्या लोकशाही वार्ता या दैनिकातही मुख्य संपादक म्हणून त्यांनी यशस्वी रीत्या जबाबदारी पार पाडली. प्रामाणिकपणा, निर्भीड लेखन आणि सामाजिक बांधिलकी त्यांनी प्रकर्षाने जपली. त्यांनी त्यांच्या लेखणीतून अनेक सामाजिक विषयांना प्रभावीपणे वाचा फोडली. पत्रकारांच्या अनेक पिढ्या त्यांनी घडविल्या. वृत्तपत्रीय लेखनशैलीचे, वैचारिक चिंतनाचे, संतुलित दृष्टिकोनाचे व माध्यम अनुशासनाचे धडे व संस्कार त्यांनी अनेकांवर केले. भारताचे माजी पंतप्रधान अटलबिहारी वाजपेयी यांच्या हस्ते त्यांना ‘पाञ्चजन्य’ पुरस्काराने गौरविण्यात आले होते. त्यांचे ‘गावोगावी’ हे आत्मचरित्र तसेच ‘सारांश’ हे पुस्तक प्रकाशित झाले आहे.

 

 

त्यांची अन्त्ययात्रा बुधवार, २९ जुलै रोजी सकाळी १०.३० वाजता पुखराज ट्यूलिप अपार्टमेंट्स, सहकारनगर, नागपूर येथील निवासस्थानावरून निघून सहकार नगर घाटावर जाईल. तेथे त्यांच्या पार्थिवावर अन्त्यसंस्कार करण्यात येईल.