स्वर्गासम भासणारी मान्सून पर्यटन स्थळे!

picturesque-villages-in-north-india : पावसाळा सुरू झाला की निसर्गरम्य आणि शांत ठिकाणी भटकंती करण्याचा मोह प्रत्येक पर्यटनप्रेमीला आणि पर्यावरणप्रेमीला होतो. प्रसिद्ध आणि गर्दीच्या पर्यटन स्थळांपेक्षा अद्याप फारसे प्रसिद्ध नसलेले, निसर्गाच्या कुशीत वसलेले एखादे शांत ठिकाण मिळाले, तर सुट्टीचा आनंद द्विगुणीत होतो. सध्या सुरू असलेल्या मान्सूनच्या दिवसांत उत्तर भारतात अशी काही अप्रतिम गावे आहेत, जिथे पाऊल ठेवताच स्वर्गात असल्याचा भास होतो. धुक्याने वेढलेले डोंगर, शांत तलाव, दाट जंगले आणि स्वच्छ हवा यांचा अनोखा अनुभव घेण्यासाठी ही गावे उत्तम पर्याय आहेत.

 

 

 

 

 

हिमाचल प्रदेशातील किन्नौर जिल्ह्यात वसलेले नाको हे अतिशय शांत आणि नयनरम्य गाव आहे. येथील प्रसिद्ध नाको तलाव, ऐतिहासिक बौद्ध मठ, पॉपलरची उंच झाडे आणि पारंपरिक पद्धतीने बांधलेली घरे पर्यटकांचे लक्ष वेधून घेतात. पावसाळ्यात धुक्याची शाल पांघरलेले हे गाव निसर्गप्रेमींसाठी एक उत्तम पर्वणी ठरते.

 

 

हिमाचल प्रदेशातीलच बास्पा नदीच्या काठावर वसलेले चितकुल हे भारत आणि तिबेट सीमेजवळील भारतातील शेवटचे गाव मानले जाते. बास्पा नदीचा खळाळणारा प्रवाह, लाकडापासून बनवलेली पारंपरिक घरे आणि सभोवतालचे उंच पर्वत ही या गावाची खास वैशिष्ट्ये आहेत. पावसाच्या दिवसांत येथील स्वच्छ हवा आणि निसर्गसौंदर्य अधिकच खुलून दिसते.

 

 

उत्तराखंड राज्यातील नैनितालजवळ वसलेले पंगोट हे छोटेसे गाव निसर्गभ्रमंती आणि पक्षीप्रेमींसाठी अतिशय लोकप्रिय आहे. ओक आणि पाइन वृक्षांची दाट जंगले तसेच विविध प्रजातींचे पक्षी हे या भागाचे मुख्य आकर्षण आहे. पावसाळ्यात येथील जंगले अधिक दाट आणि हिरवीगार दिसतात, ज्यामुळे ट्रेकिंग आणि शांततेच्या शोधात असलेल्या पर्यटकांसाठी हे उत्तम ठिकाण ठरते.

 

 

हिमाचल प्रदेशातील आणखी एक नयनरम्य ठिकाण म्हणजे कल्पा, जे भव्य हिमालयीन पर्वतरांगांच्या कुशीत वसलेले आहे. सफरचंदांच्या अथांग बागा, लाकडी कोरीव काम असलेली पारंपरिक घरे आणि समोरच दिसणारे 'किन्नर कैलास' पर्वताचे मनमोहक दृश्य पर्यटकांना भुरळ पाडते. मान्सूनमध्ये ढग आणि पर्वतांची जुगलबंदी पाहावयास मिळते, ज्यामुळे पर्यटकांना एक अत्यंत सुखद आणि आल्हाददायक अनुभव मिळतो.