बनावट सातबारा बनवून फसवणूक केल्याप्रकरणी शेतकर्‍यावर गुन्हा दाखल

case-registered-against-farmer : बनावट सातबारा आणि पीकपेर्‍याचा फेरफार करून शासकीय हमीभाव योजनेअंतर्गत जास्तीची ज्वारी विकून शासनाची दिशाभूल व फसवणूक केल्याचा धक्कादायक प्रकार उघडकीस आला आहे. या प्रकरणी बुलढाणा शहर पोलीस ठाण्यात समाधान लक्ष्मण ताठे रा. जांब या शेतकर्‍यावर गुन्हा दाखल करण्यात आला आहे.

 

 

 

बुलढाणा तालुका सहकारी शेतकी खरेदी विक्री समिती बुलढाणा यांच्यामार्फत शासकीय हमीभाव योजनेअंतर्गत पणन महासंघाच्या वतीने ज्वारी खरेदीचे केंद्र चालवले जाते. मौजे जांब येथील आरोपी समाधान लक्ष्मण ताठे या शेतकर्‍याने सन २०२४-२५ या रब्बी, खरीप व उन्हाळी हंगामाकरिता ज्वारी विक्रीसाठी ऑनलाईन नोंदणी केली होती. नोंदणीदरम्यान आरोपीने मौजे जांब येथील गट नं. २१५ मधील मूळ पीकपेरा क्षेत्र कमी असताना, ऑनलाईन एडिट करून ४.६४ हेटर आर एवढे जास्त पीकपेरा क्षेत्र दर्शवणारा बनावट व फेरफार केलेला सातबारा सादर केला. या आधारे त्याने खरेदी केंद्रावर तब्बल ४१ किंटल ज्वारीची विक्री केली. या गैरप्रकाराबाबत तक्रारदार प्रदीप दगडू पवार व भारत नामदेव शेळके यांनी जिल्हा पणन अधिकारी यांच्याकडे तक्रार दाखल केली होती. या तक्रारीनंतर तहसीलदार बुलढाणा व जिल्हा पणन अधिकारी यांनी केलेल्या चौकशीत आरोपी समाधान ताठे याच्या मूळ सातबार्‍यातील पीकपेरा क्षेत्र (०.६४हेटर) आणि सादर केलेल्या ऑनलाइन सातबार्‍यातील क्षेत्र (४.६४ हेटर) यामध्ये मोठा फरक असल्याचे निष्पन्न झाले. आरोपीने बनावट कागदपत्रांच्या आधारे शासनाची व खरेदी विक्री संस्थेची फसवणूक केल्याचे सिद्ध झाल्यानंतर, बुलढाणा तालुका सहकारी शेतकी खरेदी विक्री समितीचे प्रभारी व्यवस्थापक संदीप भीमराव कांबळे यांनी बुलढाणा शहर पोलीस ठाण्यात तक्रार दिली. संदीप कांबळे यांच्या तक्रारीवरून बुलढाणा शहर पोलिसांनी २७ जुलै आरोपी समाधान लक्ष्मण ताठे रा. जांब याच्याविरुद्ध गुन्हा दाखल केला आहे. या प्रकरणाचा पुढील तपास बुलढाणा शहर पोलिस स्टेशनचे पोउपनि संतोष कदम करीत आहे.