शेअर बाजारात ग्रीन सिग्नल; आयटी शेअर्स चढले

Green signal in the stock market आठवड्याच्या शेवटच्या ट्रेडिंग सत्रात देशांतर्गत शेअर बाजाराने दमदार सुरुवात केली. आयटी क्षेत्रातील मजबूत खरेदीमुळे बाजारात सकारात्मक वातावरण निर्माण झाले असून सेन्सेक्स आणि निफ्टी दोन्ही निर्देशांकांनी सुरुवातीपासूनच तेजी दाखवली. विशेषतः एचसीएल टेकच्या शेअरमध्ये झालेल्या मोठ्या उसळीमुळे गुंतवणूकदारांचा उत्साह वाढलेला दिसून आला.बाजार उघडताच बीएसईचा सेन्सेक्स ४५०.७८ अंकांनी वाढून ७७,९५२.९० वर पोहोचला. तर नॅशनल स्टॉक एक्सचेंजचा निफ्टी १३८.७५ अंकांच्या वाढीसह २४,३१४.४५ वर व्यवहार करत होता. सुरुवातीच्या सत्रात निफ्टीने २४,३०० चा महत्त्वपूर्ण टप्पाही सहज पार केला.

 

 

 

सकाळच्या व्यवहारात बाजारातील तेजी स्पष्टपणे दिसून आली. एकूण १२३ शेअर्स वाढीसह व्यवहार करत होते, तर ४४ शेअर्समध्ये घसरण नोंदवली गेली. ५ शेअर्समध्ये कोणताही बदल दिसून आला नाही.आजच्या तेजीमागील सर्वात मोठा आधार ठरला तो एचसीएल टेक. सकाळी ९:२६ वाजता एचसीएल टेकचा शेअर ₹११२०.०५ वर पोहोचला होता. या शेअरमध्ये तब्बल ३.९५ टक्क्यांची वाढ नोंदवली गेली. कंपनीला युरोपमधील मुख्यालय असलेल्या एका फॉर्च्यून ग्लोबल ५० कंपनीकडून १.१४ अब्ज डॉलरचा मोठा धोरणात्मक करार मिळाल्याने हा उत्साह पाहायला मिळाला.

 

 

या कराराअंतर्गत एचसीएल टेक एआय-आधारित ऑपरेटिंग मॉडेलच्या मदतीने संबंधित कंपनीच्या डिजिटल वर्कप्लेस आणि एंटरप्राइझ नेटवर्क ऑपरेशन्समध्ये व्यापक बदल घडवून आणणार आहे. यंदाच्या वर्षात भारतीय आयटी सेवा क्षेत्रातील हा सर्वात मोठ्या करारांपैकी एक मानला जात आहे.एचसीएल टेकसोबतच इतर आयटी आणि मेटल क्षेत्रातील शेअर्समध्येही चांगली तेजी दिसली. बजाज फिनसर्व्ह २.६८ टक्क्यांनी वाढून ₹१९०५.८५ वर पोहोचला. टाटा स्टील २.२२ टक्क्यांच्या वाढीसह ₹१९१.३० वर व्यवहार करत होता. टेक महिंद्रा २.१४ टक्क्यांनी वाढून ₹१४१५.०० वर पोहोचला. टीसीएसमध्ये १.८८ टक्क्यांची वाढ झाली, तर इन्फोसिसमध्ये १.२४ टक्क्यांची तेजी नोंदवली गेली. मात्र, तेजीच्या वातावरणात काही शेअर्सवर विक्रीचा दबाव कायम राहिला. एनटीपीसीच्या शेअरमध्ये ०.५६ टक्क्यांची घसरण झाली असून तो ₹३५६.३५ वर व्यवहार करत होता. याशिवाय अदानी पोर्ट्स, महिंद्रा अँड महिंद्रा, स्टेट बँक ऑफ इंडिया आणि इंडिगोच्या शेअर्समध्येही किरकोळ घसरण दिसून आली.