रोहितचा सिक्सर किंग ताज करणबीरने हिसकावला!
Total Views |
नवी दिल्ली,
rohit-sharma : ऑस्ट्रिया क्रिकेट संघाचा कर्णधार करणबीर सिंगने २८ जून रोजी हंगेरीविरुद्धच्या टी-२० आंतरराष्ट्रीय सामन्यात अवघ्या ५७ चेंडूंमध्ये १६४ धावा करून एक महत्त्वपूर्ण टप्पा गाठला. आपल्या या खेळीत करणबीर सिंगने १८ चौकार आणि १२ षटकार मारले. यासह, करणबीर सिंगने आता भारताचा माजी कर्णधार रोहित शर्माला मागे टाकत, टी-२० आंतरराष्ट्रीय सामन्यांमध्ये सर्वाधिक षटकार मारणाऱ्या खेळाडूंच्या यादीत अव्वल स्थान पटकावले आहे. २०२४ च्या टी-२० विश्वचषक स्पर्धेचा अंतिम सामना जिंकल्यानंतर आंतरराष्ट्रीय क्रिकेटमधून निवृत्त झालेल्या रोहितच्या नावावर एकूण २०५ षटकार होते. आता, करणबीर सिंगने या यादीत रोहितला मागे टाकले असून एकूण २०७ षटकारांसह अव्वल स्थान पटकावले आहे.
रोहित शर्माने एकूण १५९ टी-२० आंतरराष्ट्रीय सामने खेळले असून १५१ डावांमध्ये फलंदाजी केली आहे. त्याने ३२.०५ च्या सरासरीने ४२३१ धावा केल्या आणि २०० किंवा त्याहून अधिक षटकार मारणारा तो पहिला खेळाडू ठरला. ऑस्ट्रियाचा कर्णधार करणबीर सिंगने केवळ ६० टी-२० आंतरराष्ट्रीय सामन्यांमध्ये रोहित शर्माला मागे टाकले. त्याने ५९ डावांमध्ये ४८.७१ च्या सरासरीने २५३३ धावा केल्या आणि २०७ षटकार मारले. करणबीर सिंगने आतापर्यंत टी-२० आंतरराष्ट्रीय सामन्यांमध्ये चार शतके आणि २० अर्धशतकेही झळकावली आहेत.
टी२० आंतरराष्ट्रीय सामन्यांमध्ये सर्वाधिक षटकार मारणारे खेळाडू
करणबीर सिंग (ऑस्ट्रिया) - २०७ षटकार
रोहित शर्मा (भारत) - २०५ षटकार
मोहम्मद वसीम (यूएई) - १९६ षटकार
सूर्यकुमार यादव (भारत) - १७९ षटकार
जोस बटलर (इंग्लंड) - १७५ षटकार
हंगेरीविरुद्धच्या तीन सामन्यांच्या टी२० मालिकेतील अंतिम सामन्यात, ऑस्ट्रियाने प्रथम फलंदाजी करताना २० षटकांत ७ गडी गमावून ३२२ धावा केल्या. कर्णधार करणबीर सिंगने १६४ धावा केल्या, तर अब्दुल्ला कोटवानेही अवघ्या २६ चेंडूंमध्ये ९३ धावा केल्या. यासह, ऑस्ट्रियाने आता टी२० आंतरराष्ट्रीय सामन्यांमध्ये दुसरी सर्वोच्च धावसंख्या गाठली आहे. या यादीत झिम्बाब्वे संघाचा समावेश आहे, ज्यांनी २०२४ साली गाम्बियाविरुद्ध ३४४ धावा करून हा पराक्रम केला होता.