बलुचिस्तानात भीषण आत्मघाती हल्ला, 30 जवान ठार!

Massive suicide attack in Balochistan बलुचिस्तानमधील ग्वादर येथे पाकिस्तान तटरक्षक दलाच्या छावणीवर झालेल्या भीषण आत्मघाती हल्ल्यामुळे मोठी खळबळ उडाली आहे. या हल्ल्यात ३० हून अधिक पाकिस्तानी निमलष्करी जवान ठार झाल्याचा दावा करण्यात आला असून अनेक जण गंभीर जखमी झाल्याची माहिती समोर आली आहे. बंदी घातलेल्या बलुच लिबरेशन आर्मी या संघटनेने या हल्ल्याची जबाबदारी स्वीकारली आहे. संघटनेने जारी केलेल्या निवेदनानुसार, जिवानी परिसरातील पनवान तटरक्षक तळाला स्फोटकांनी भरलेल्या वाहनाद्वारे लक्ष्य करण्यात आले. हा हल्ला सुनियोजित पद्धतीने राबवण्यात आल्याचा दावा बीएलएने केला आहे. आत्मघाती वाहनाधारित स्फोटक उपकरणाचा वापर करून छावणीला मोठा फटका देण्यात आल्याचे संघटनेने म्हटले आहे.

 

 

 

एका वृत्तानुसार, बीएलएचे प्रवक्ते जीयंद बलुच यांनी निवेदनात सांगितले की, प्रचंड स्फोटामुळे तटरक्षक दलाची संपूर्ण तटबंदी उद्ध्वस्त झाली. स्फोटानंतर बीएलएच्या फतेह पथकाने तात्काळ पुढे सरकत सर्व बाजूंनी छावणीवर हल्ला चढवला.बीएलएने दावा केला आहे की या हल्ल्यामुळे छावणी पूर्णपणे नष्ट झाली आणि सुरक्षा दलाचे मोठे नुकसान झाले. संघटनेच्या म्हणण्यानुसार, या घटनेत ३० हून अधिक जवान ठार झाले असून डझनभर जण गंभीर जखमी झाले आहेत. जखमींची अवस्था गंभीर असल्याने मृतांचा आकडा आणखी वाढण्याची शक्यता व्यक्त केली जात आहे.

 

दरम्यान, बीएलएच्या मीडिया शाखा ‘हक्काल’ने या आत्मघाती हल्ल्याचा ४३ सेकंदांचा व्हिडिओही प्रसिद्ध केल्याचा दावा करण्यात आला आहे. या व्हिडिओमध्ये स्फोटकांनी भरलेला ट्रक छावणीत घुसताना आणि काही क्षणांत प्रचंड स्फोट होताना दिसत असल्याचे सांगितले जात आहे. या घटनेनंतरही पाकिस्तानी प्रशासनाकडून मृतांचा आकडा किंवा बीएलएच्या दाव्यांबाबत अधिकृत पुष्टी करण्यात आलेली नाही. अद्याप कोणतेही अधिकृत निवेदन जारी झालेले नाही. उल्लेखनीय म्हणजे, बीएलए हा बलुचिस्तानमधील बंदी घातलेला फुटीरतावादी गट असून, पाकिस्तानच्या सुरक्षा दलांवर आणि महत्त्वाच्या पायाभूत सुविधांवर हल्ले करण्यासाठी तो ओळखला जातो.