Signal Jumpers शहरातील प्रमुख चौकांमध्ये वाहतूक सिग्नलचे उल्लंघन करणाऱ्या वाहनचालकांविरोधात वाहतूक पोलिसांनी कठोर भूमिका घेतली असून, यावर्षी जून अखेरपर्यंत तब्बल ६ हजार २७८ वाहनचालकांवर दंडात्मक कारवाई करण्यात आली आहे. सातत्याने होणाऱ्या ‘सिग्नल जम्पिंग’मुळे अपघातांचा धोका वाढत असल्याने वाहतूक पोलिसांनी विशेष मोहीम राबवत नियमभंग करणाऱ्यांना चांगलाच दणका दिला आहे. वाहतूक पोलिसांनी सिग्नल तोडणाऱ्या चक्क ६ हजार २०० वर वाहनचालकां दंडात्मक कारवाई केली आहे.

शहरातील वाहतूक अधिक शिस्तबद्ध करण्यासाठी प्रमुख चौकांमध्ये पोलिसांची उपस्थिती वाढविणे, सीसीटीव्हीद्वारे सतत निरीक्षण ठेवणे आणि ई-चलानद्वारे तत्काळ दंड आकारण्याची प्रक्रिया सुरू आहे. नागरिकांनी वाहतूक नियमांचे पालन करून रेड सिग्नलला थांबावे, हेल्मेट व सीटबेल्टचा वापर करावा आणि सुरक्षित वाहनचालना करावी, असे आवाहन वाहतूक पोलिसांनी केले आहे. पोलिसांच्या या आक्रमक कारवाईमुळे वाहतूक शिस्त सुधारण्यास मदत होणार आहे.

रेड सिग्नल असल्यानंतर ६० ते ९० सेकंदाचा वेळ सिग्नलवर वाहनचालकांना थांबणे कंटाळवाणे वाटते. रेड सिग्नल संपण्यासाठी ८ ते ९ सेकंदाचा वेळ बाकी असताना वाहनचालक वाहन सुरू करून पुढे न्यायला लागतात. शेवटचे पाच सेकंद बाकी असताना अनेक वाहनचालक सुसाट वाहने पळवितात. अशा घाईत यलो सिग्नलमध्ये धावणाऱ्या वाहनासोबत समोरासमोर टक्कर होण्याची भीती असते. याच पाच सेकंदाच्या वेळेतच सर्वाधिक अपघात झाल्याची नोंद आहे.