ICC रँकिंगमध्ये भारताला मोठा धक्का!

major setback for india in icc rankings भारताच्या टी-20 संघाच्या अलीकडील निराशाजनक कामगिरीचा परिणाम आता आयसीसी क्रमवारीवरही दिसू लागला आहे. श्रेयस अय्यरच्या नेतृत्वाखाली भारतीय संघाला अद्याप एकही टी-20 आंतरराष्ट्रीय सामना जिंकता आलेला नाही. चार सामन्यांपैकी तीन सामन्यांत पराभव स्वीकारावा लागला असून, एक सामना पावसामुळे रद्द झाला आहे. त्यामुळे भारत आणि इंग्लंडमधील आयसीसी टी-20 रेटिंगमधील अंतरही लक्षणीयरीत्या कमी झाले आहे.

आयर्लंड दौऱ्यापासून भारतीय संघाची घसरगुंडी सुरू झाली. मालिकेतील दोन्ही सामने गमावत भारताला प्रथमच आयर्लंडविरुद्ध एकही विजय मिळवता आला नाही. त्यानंतर इंग्लंड दौऱ्यात पहिला सामना पावसामुळे रद्द झाला, तर दुसऱ्या सामन्यात इंग्लंडने भारताचा चार गडी राखून पराभव केला. त्यामुळे श्रेयस अय्यरच्या नेतृत्वाखाली विजयाचे खाते अजूनही उघडलेले नाही. मालिका सुरू होण्यापूर्वी आयसीसी टी-20 क्रमवारीत भारताचे रेटिंग २७२ होते, तर इंग्लंडचे २६२ होते. मात्र, सध्याच्या क्रमवारीत भारताचे रेटिंग २७१ वर घसरले असून, इंग्लंडचे रेटिंग २६४ पर्यंत वाढले आहे. परिणामी, दोन्ही संघांमधील रेटिंगचा फरक १० गुणांवरून केवळ ७ गुणांवर आला आहे.

दरम्यान, पाच सामन्यांच्या मालिकेत अजून तीन सामने शिल्लक आहेत. मात्र भारतीय संघावर केवळ मालिका गमावण्याचेच नव्हे, तर आयसीसी क्रमवारीत आणखी घसरण होण्याचेही संकट आहे. भारताने पुढील सामने गमावल्यास इंग्लंडसोबतचे रेटिंगमधील अंतर आणखी कमी होऊ शकते. मालिकेतील तिसरा टी-20 सामना मंगळवार, ७ जुलै रोजी खेळवला जाणार असून, या सामन्याकडे भारतीय संघाच्या पुनरागमनाच्या दृष्टीने महत्त्वाचे पाऊल म्हणून पाहिले जात आहे.