अमेरिकेच्या हवाई कारवाईनंतर इराणचे प्रत्युत्तर

Iran's response following the US airstrike अमेरिकेसोबत वाढत्या तणावाच्या पार्श्वभूमीवर इराणने मोठा दावा करत बहरीन आणि कुवेतमधील ८५ अमेरिकी लष्करी तळांवर क्षेपणास्त्रे आणि ड्रोनद्वारे हल्ले केल्याचे म्हटले आहे. इराणच्या इस्लामिक रिव्होल्यूशनरी गार्ड कॉर्प्स (आयआरजीसी)ने निवेदन जारी करत ही कारवाई त्यांच्या नौदल आणि हवाई दलाने संयुक्तपणे केल्याचा दावा केला आहे. आयआरजीसीच्या माहितीनुसार, या मोहिमेत अनेक महत्त्वाच्या अमेरिकी लष्करी ठिकाणांना लक्ष्य करण्यात आले. त्यामध्ये बहरीनमधील अमेरिकी फिफ्थ फ्लीट बेस तसेच कुवेतमधील अली अल-सलेम हवाई तळाचा समावेश असल्याचे इराणने म्हटले आहे.

 

 

 

इराणने या कारवाईमागे अमेरिकेच्या कथित हवाई हल्ल्यांचा संदर्भ दिला आहे. इराणच्या म्हणण्यानुसार, अमेरिकेने यापूर्वी होर्मोझगान आणि महशहर येथील किनारी तसेच काही गैर-लष्करी तळांवर हवाई हल्ले केले होते. तसेच शस्त्रसंधी आणि इस्लामाबाद कराराचे कथित उल्लंघन केल्याच्या निषेधार्थ हे प्रत्युत्तर देण्यात आल्याचा दावा करण्यात आला आहे.आयआरजीसीने अमेरिकेवर आणखी एक आरोप करत म्हटले आहे की, इराणच्या दिवंगत नेत्याच्या अंत्ययात्रेदरम्यान अमेरिकेने लष्करी कारवाई केली. या कृतीद्वारे त्या ऐतिहासिक घटनेचे महत्त्व कमी करण्याचा प्रयत्न करण्यात आल्याचा आरोपही इराणने केला आहे. इराणने स्पष्ट केले की, ही कारवाई अमेरिकेच्या हालचालींना दिलेले प्राथमिक प्रत्युत्तर आहे. मात्र, इराणच्या या दाव्याबाबत अमेरिका, बहरीन किंवा कुवेत यांनी अद्याप कोणतीही अधिकृत प्रतिक्रिया दिलेली नाही. त्यामुळे या दाव्याची स्वतंत्रपणे पुष्टी झालेली नाही. मात्र, या घडामोडींमुळे आधीच संवेदनशील असलेल्या मध्य-पूर्वेतील तणाव आणखी वाढण्याची शक्यता व्यक्त केली जात आहे.