मोठी बातमी! वारकऱ्यांसाठी कायमस्वरूपी निवाऱ्याची सोय

cm pramod sawant गोमंतकीय वारकऱ्यांसाठी मुख्यमंत्री डॉ. प्रमोद सावंत यांनी मोठी घोषणा केली आहे. पंढरपूर येथे गोमंतकीय वारकऱ्यांसाठी स्वतंत्र ‘गोवा विठ्ठल-रुक्मिणी भवन’ उभारण्यात येणार असून, त्यासाठी जागा निश्चित करण्यात आल्याची माहिती मुख्यमंत्री डॉ. प्रमोद सावंत यांनी दिली. आषाढी वारीसाठी पंढरपूरकडे निघालेल्या वारकऱ्यांना शुभेच्छा देताना त्यांनी ही माहिती जाहीर केली.

 

 

दरवर्षी हजारो वारकरी आषाढी वारीसाठी पंढरपूरला जातात. मात्र, पंढरपूरमध्ये त्यांच्या मुक्कामासाठी कायमस्वरूपी आणि स्वतंत्र सुविधा उपलब्ध नसल्याची समस्या अनेक वर्षांपासून होती. ही अडचण लक्षात घेऊन मुख्यमंत्री डॉ. प्रमोद सावंत यांनी मागील वर्षी गोवा भवन उभारण्याची घोषणा केली होती. आता या घोषणेला प्रत्यक्ष स्वरूप देत गोवा भवनासाठी जमीन निश्चित करण्यात आली आहे.या भवनामुळे गोमंतकीय वारकऱ्यांना पंढरपूरमध्ये सुरक्षित, सुसज्ज आणि हक्काचे निवासस्थान उपलब्ध होणार आहे. पुढील वर्षीच्या आषाढी एकादशीपूर्वी हे भवन पूर्ण करण्याचा सरकारचा प्रयत्न असल्याचे मुख्यमंत्री डॉ. प्रमोद सावंत यांनी सांगितले.

 

 

याशिवाय, गोव्यातील नोंदणीकृत वारकरी दिंड्यांना प्रवासासाठी आर्थिक सहाय्य देण्याची घोषणाही करण्यात आली आहे. गोवा सरकारच्या कला आणि संस्कृती संचालनालयामार्फत मुख्यमंत्री डॉ. प्रमोद सावंत यांच्या हस्ते ३६ नोंदणीकृत वारकरी दिंड्यांना आर्थिक मदत देण्यात आली.दिंडीतील वारकऱ्यांच्या संख्येनुसार प्रत्येक नोंदणीकृत दिंडीला एक लाख रुपयांपासून पाच लाख रुपयांपर्यंत आर्थिक सहाय्य दिले जाणार आहे. ही रक्कम थेट संबंधित दिंड्यांना वितरित केली जाणार आहे. या योजनेअंतर्गत किमान ४० वारकरी असलेल्या नोंदणीकृत दिंड्यांना परतीच्या बसप्रवासासाठी आर्थिक मदत तसेच इतर आवश्यक सुविधा उपलब्ध करून दिल्या जाणार आहेत.

यंदाच्या वारीसाठी सुमारे ३५०० वारकऱ्यांची नोंदणी करण्यात आली आहे. तसेच प्लास्टिकमुक्त वारीला प्रोत्साहन देण्यासाठी वारकऱ्यांना कापडी पिशव्या, पारंपरिक वारकरी वेशभूषा, औषधांचे संच (मेडिकल किट) उपलब्ध करून देण्यात आले आहेत. वारीच्या मार्गावर निश्चित ठिकाणी वैद्यकीय सुविधांचीही व्यवस्था करण्यात आली आहे.या उपक्रमांमुळे गोमंतकीय वारकऱ्यांचा प्रवास अधिक सुरक्षित, सोयीस्कर आणि पर्यावरणपूरक होणार आहे. मुख्यमंत्री डॉ. प्रमोद सावंत यांच्या घोषणांमुळे वारकरी संप्रदायाच्या अनेक वर्षांपासूनच्या मागण्या पूर्ण होणार असल्याने या निर्णयाचे स्वागत करण्यात येत आहे. यंदाची आषाढी वारी गोमंतकीय वारकऱ्यांसाठी अधिक आनंददायी ठरणार असल्याची भावना वारकरी संप्रदायाकडून व्यक्त केली जात आहे.