इन्स्टंट नूडल्सचे अतिसेवन ठरू शकते आरोग्यासाठी घातक

इन्स्टंट नूडल्स हा अनेकांच्या आहाराचा आणि आवडीचा भाग बनला आहे. काही मिनिटांत तयार होणारा हा पदार्थ लहान मुलांपासून ते मोठ्यांपर्यंत सर्वांनाच आवडतो. चीज, बटर, भाज्या किंवा विविध मसाल्यांचा वापर करून त्याची चव अधिक वाढवली जाते. तसेच शेजवानसह विविध फ्लेवर्समधील नूडल्सही मोठ्या प्रमाणावर खाल्ले जातात. मात्र, सोयीस्कर आणि चविष्ट वाटणारे हे इन्स्टंट नूडल्स नियमित खाल्ल्यास आरोग्यावर विपरीत परिणाम होऊ शकतात, असा तज्ज्ञांचा इशारा आहे.

 

 

 

इन्स्टंट नूडल्स प्रामुख्याने मैद्यापासून तयार केले जातात. त्यात सोडियम, संरक्षक द्रव्ये (प्रिझर्व्हेटिव्ह्ज) आणि काही प्रकारचे अस्वास्थ्यकर फॅट्स मोठ्या प्रमाणात असू शकतात. त्यामुळे त्यांचे वारंवार सेवन केल्यास विविध आरोग्यविषयक समस्या निर्माण होण्याचा धोका वाढतो.

नूडल्समध्ये सोडियमचे प्रमाण तुलनेने जास्त असल्याने त्याचे अतिसेवन केल्यास रक्तदाब वाढू शकतो. दीर्घकाळ उच्च रक्तदाब राहिल्यास हृदयासह इतर महत्त्वाच्या अवयवांवर त्याचा विपरीत परिणाम होण्याची शक्यता असते.

याशिवाय, इन्स्टंट नूडल्स अधिक काळ टिकावेत यासाठी त्यामध्ये संरक्षक द्रव्यांचा वापर केला जातो. ताजी फळे, भाज्या, कडधान्ये आणि धान्य यांसारख्या नैसर्गिक अन्नपदार्थांच्या तुलनेत अशा प्रक्रिया केलेल्या अन्नपदार्थांचे नियमित सेवन आरोग्यासाठी योग्य मानले जात नाही.

इन्स्टंट नूडल्समध्ये अस्वास्थ्यकर फॅट्सचे प्रमाणही जास्त असू शकते. त्यामुळे शरीरातील कोलेस्टेरॉलची पातळी वाढण्याचा धोका निर्माण होतो. वाढलेले कोलेस्टेरॉल हृदयविकारासारख्या गंभीर आजारांचे कारण ठरू शकते.

याशिवाय, नूडल्सचे वारंवार सेवन केल्याने वजन वाढणे, रक्तातील साखरेची पातळी वाढणे आणि रक्तदाब नियंत्रणाबाहेर जाणे अशा मेटाबॉलिक समस्या उद्भवू शकतात. त्यामुळे अशा पदार्थांचे प्रमाण मर्यादित ठेवण्याचा सल्ला दिला जातो.पोषणमूल्यांच्या दृष्टीने पाहिले असता इन्स्टंट नूडल्समध्ये कॅलरीजचे प्रमाण तुलनेने जास्त असले, तरी प्रथिने, तंतुमय घटक (फायबर), जीवनसत्त्वे आणि खनिजे यांसारखे शरीरासाठी आवश्यक पोषक घटक अत्यल्प प्रमाणात असतात. त्यामुळे केवळ नूडल्सवर आधारित आहार शरीराच्या पोषणाच्या गरजा पूर्ण करू शकत नाही.तज्ज्ञांच्या मते, इन्स्टंट नूडल्सचे अधूनमधून आणि मर्यादित प्रमाणात सेवन केल्यास धोका कमी असू शकतो. मात्र, त्यांचा नियमित आहार म्हणून वापर टाळून संतुलित, पोषक आणि ताज्या अन्नपदार्थांना प्राधान्य देणे आरोग्यासाठी अधिक हितावह ठरते.