दररोज धुतल्यानंतरही पाण्याच्या बाटलीत दुर्गंधी?

washing water bottle आपण वापरत असलेली पाण्याची बाटली नियमितपणे स्वच्छ धुत असलो, तरी काही दिवसांनी त्यातून एक विशिष्ट उग्र किंवा दमट वास येऊ लागतो. अनेकांना हा वास बाटली नीट स्वच्छ न केल्यामुळे येतो, असे वाटते. मात्र तज्ज्ञांच्या मते, यामागे केवळ अस्वच्छता नसून बाटलीच्या झाकणामध्ये घडणारी रासायनिक प्रक्रिया आणि अडकून राहणारा ओलावा हे मुख्य कारण असते.

 

 

 

 

तज्ज्ञांच्या माहितीनुसार, बाटलीच्या झाकणावरील थ्रेड्स आणि छोट्या खाचांमध्ये धुतल्यानंतर पाण्याचे सूक्ष्म थेंब अडकून राहतात. अनेकजण बाटली धुतल्यानंतर ती पूर्णपणे कोरडी होण्याची वाट न पाहता लगेच झाकण लावून बंद करतात. त्यामुळे आत ओलसर वातावरण तयार होते. अशा परिस्थितीत प्लास्टिकच्या घटकांमध्ये हळूहळू रासायनिक विघटन सुरू होते. यामुळे बाटलीतून दुर्गंधी येऊ लागते आणि त्याचा परिणाम पाण्याच्या चवीवरही होतो.

'वॉटर रिसर्च' (Water Research) या जर्नलमध्ये प्रसिद्ध झालेल्या अभ्यासानुसार, बहुतांश पाण्याच्या बाटल्या पॉलिइथिलीन (Polyethylene) या प्लास्टिकपासून तयार केल्या जातात. हा पदार्थ पाणी आणि प्रकाशाच्या सतत संपर्कात राहिल्यास त्यामध्ये रासायनिक बदल होऊ लागतात. या प्रक्रियेदरम्यान तयार होणारी सूक्ष्म रसायने दुर्गंधी निर्माण करतात. याशिवाय झाकणामध्ये साचलेला ओलावा, सूक्ष्मजीवांची वाढ आणि ऑक्सिडेशनमुळे ही समस्या अधिक गंभीर होऊ शकते.

तज्ज्ञांच्या मते, बाटली धुतल्यानंतर ती आणि तिचे झाकण वेगवेगळे ठेवून पूर्णपणे कोरडे होऊ द्यावे. बाटली लगेच बंद करण्याऐवजी काही वेळ हवा खेळती राहील अशा ठिकाणी ठेवणे अधिक योग्य ठरते. तसेच बाटली दीर्घकाळ कडक उन्हात किंवा थेट प्रकाशात ठेवणे टाळावे, कारण उष्णतेमुळे प्लास्टिकचे रासायनिक विघटन अधिक वेगाने होते.

जर बाटलीतून आधीच तीव्र दुर्गंधी येत असेल, तर कोमट पाण्यात लिंबाचा रस, बेकिंग सोडा किंवा व्हिनेगर मिसळून बाटली काही वेळ भिजवून ठेवावी.washing water bottle त्यानंतर ती स्वच्छ धुवून पूर्णपणे कोरडी केल्यास दुर्गंधी कमी होण्यास मदत होते. योग्य पद्धतीने बाटलीची देखभाल केल्यास पाण्याची गुणवत्ता आणि चवही दीर्घकाळ चांगली राहू शकते.