संशयास्पद हालचालींनंतर सुरक्षा यंत्रणा सतर्क

jammu and kashmir जम्मू-काश्मीरमधील पुंछ जिल्ह्यातील मेंढर सेक्टरमध्ये निर्माणाधीन सुरंगाजवळ संशयास्पद हालचाल आढळून आल्यानंतर सुरक्षा यंत्रणा सतर्क झाली आहे. मंगळवारी सकाळी पोलिस, विशेष अभियान गट (SOG) आणि केंद्रीय राखीव पोलीस दलाच्या (CRPF) जवानांनी परिसरात व्यापक संयुक्त शोधमोहीम सुरू केली. सुरंगाच्या बांधकामस्थळी कर्तव्यावर असलेल्या एका सुरक्षा कर्मचाऱ्याला सकाळी संशयास्पद हालचाल दिसून आली. त्यानंतर खबरदारीचा उपाय म्हणून त्याने संशयित हालचाल झालेल्या दिशेने सुमारे तीन ते चार फैरी झाडल्या.

 

 

गोळीबारानंतर परिसरातील सुरक्षा व्यवस्था अधिक कडक करण्यात आली. अधिकाऱ्यांच्या माहितीनुसार, या घटनेत अद्याप कोणतीही जीवितहानी झाल्याचे किंवा मालमत्तेचे नुकसान झाल्याचे वृत्त नाही. घटनेची माहिती मिळताच सकाळी सुमारे सहा वाजता पोलिस, SOG आणि CRPFच्या जवानांनी संयुक्त शोधमोहीम सुरू केली.

सुरक्षादलांनी भाटादुरियन, सांगियोट तसेच आसपासच्या वनक्षेत्रात संशयितांचा शोध सुरू केला आहे. परिसरात ये-जा करणाऱ्या मार्गांवरही देखरेख वाढवण्यात आली आहे. मात्र, सुरक्षा कर्मचाऱ्याला नेमकी कोणत्या स्वरूपाची संशयास्पद हालचाल दिसली होती आणि परिसरात प्रत्यक्षात कोणतीही संशयित व्यक्ती होती का, हे अद्याप स्पष्ट झालेले नाही. जंगल आणि लगतच्या भागात सुरक्षादलांकडून कसून शोध घेतला जात असून शोधमोहीम अद्याप सुरू आहे. या घटनेबाबत अधिक तपशील अद्याप समोर आलेला नाही.

दरम्यान, जम्मू-काश्मीरमधील सांबा आणि कठुआ जिल्ह्यांत हेरॉईन जप्त केल्यानंतर १७ वर्षीय अल्पवयीनासह तीन संशयित तस्करांना ताब्यात घेण्यात आले आहे. पोलिसांनी दिलेल्या माहितीनुसार, सांबा जिल्ह्यातील बारी ब्राह्मणा परिसरात रविवारी रात्री मोटारसायकलवरून जात असलेल्या एका अल्पवयीनाला थांबवण्यात आले. त्याची झडती घेतली असता त्याच्याकडून ३.३६ ग्रॅम हेरॉईन जप्त करण्यात आले.यानंतर संबंधित किशोराला ताब्यात घेण्यात आले असून अमली पदार्थ तसेच मोटारसायकल जप्त करण्यात आली आहे. अल्पवयीनाविरुद्ध स्वापक औषधी व मनःप्रभावी पदार्थ (NDPS) अधिनियमातील विविध कलमांनुसार गुन्हा दाखल करण्यात आला आहे.