हनी सिंहने दिला डोस; बादशाह पुन्हा ट्रोलिंगच्या निशाण्यावर!

samay raina स्टँड-अप कॉमेडियन समय रैना आपल्या अनोख्या विनोदी शैलीमुळे आणि लोकप्रिय ‘इंडियाज गॉट लेटेंट’च्या नव्या बोनस एपिसोडमुळे पुन्हा एकदा चर्चेत आला आहे. १० ऑगस्ट २०२६ रोजी केवळ चॅनेल मेंबर्ससाठी प्रदर्शित करण्यात आलेल्या या सीझन २च्या विशेष भागात समय रैनाने देशातील प्रसिद्ध रॅपर बादशाहसमोरच त्याचा आणि यो यो हनी सिंह यांच्यातील अनेक वर्षांपासून सुरू असलेल्या वादाचा उल्लेख करत वातावरण रंगवले. समयच्या या मिश्किल विनोदावर प्रेक्षकांनी जोरदार ठहाके दिले आणि हा प्रसंग काही वेळातच सोशल मीडियावर व्हायरल झाला. त्यानंतर बादशाह खोटे बोलत असल्याचा दावा करणाऱ्या प्रतिक्रिया उमटू लागल्या. एवढेच नव्हे, तर हनी सिंहनेही या प्रकरणावर तीव्र प्रतिक्रिया दिल्याने बादशाहला मोठ्या प्रमाणावर ट्रोल केले जात आहे.

 

 

शोमध्ये एका स्पर्धकाची कामगिरी संपल्यानंतर समय रैनाने माईक हातात घेतला आणि सूर लावत अचानक गाणे सुरू केले. त्याच्या गाण्यातील शब्द थेट बादशाह आणि हनी सिंह यांच्यातील जुन्या मतभेदांकडे निर्देश करणारे होते. समयने मिश्कील अंदाजात स्वतःला हनी सिंहचा चाहता असल्याचे सांगितले आणि त्यानंतर सुपरहिट ‘ब्राउन रंग’ या गाण्याचा उल्लेख करत बादशाहवर विनोदी टोला लगावला. समयची चुटकी घेण्याची शैली आणि त्यावेळी बादशाहच्या चेहऱ्यावरील हावभाव पाहून प्रेक्षकांमध्ये एकच हशा पिकला. या प्रसंगाची एक छोटी क्लिप सोशल मीडिया प्लॅटफॉर्म एक्सवर व्हायरल झाली असून, समयच्या कॉमिक टाइमिंगचे नेटकऱ्यांकडून कौतुक केले जात आहे.

समय रैनाच्या या विनोदामागे भारतीय हिप-हॉप विश्वातील जुन्या वादाची पार्श्वभूमी आहे. बादशाह आणि यो यो हनी सिंह हे एकेकाळी अत्यंत लोकप्रिय हिप-हॉप समूह ‘माफिया मुंदीर’चे महत्त्वाचे सदस्य होते. मात्र, नंतर व्यावसायिक मतभेदांमुळे दोघांचे मार्ग वेगळे झाले. त्यानंतर गाण्यांच्या ओळी, संगीताच्या धून आणि गाण्यांचे क्रेडिट यावरून दोघांमध्ये अनेकदा सार्वजनिक वाद पाहायला मिळाले. विशेषतः ‘ब्राउन रंग’ या ब्लॉकबस्टर गाण्याच्या श्रेयावरून दोघांमध्ये दीर्घकाळापासून मतभेद आहेत. बादशाहचा दावा आहे की या गाण्याचे बोल त्याने लिहिले होते, तर त्याची धून हनी सिंहने तयार केली होती. जुलै २०२५ मध्येही हा वाद पुन्हा चर्चेत आला होता. त्यावेळी बादशाहने सोशल मीडियावर हनी सिंहशी संबंधित एका पोस्टखाली केवळ ‘क्रेडिट्स’ अशी टिप्पणी केली होती.

 

 

याच एपिसोडमध्ये समय रैनाने बादशाहला त्याच्या स्टेज नेममागील कथाही विचारली. त्यावर बादशाहने हे नाव त्याने स्वतःसाठी निवडल्याचे सांगितले. मात्र, एपिसोड प्रसारित झाल्यानंतर प्रेक्षकांनी दोन्ही रॅपर्सचा जुना व्हिडीओ शोधून काढला. या व्हिडीओमध्ये बादशाह स्वतः ‘बादशाह’ हे नाव त्याला प्रत्यक्षात हनी सिंहने दिल्याचे मान्य करताना दिसत आहे. हा जुना व्हिडीओ इंटरनेटवर व्हायरल होताच हनी सिंहनेही त्यावर खोचक प्रतिक्रिया दिली. त्याने ‘मेरी नालायक औलाद’ अशी टिप्पणी केली. हनी सिंहच्या या प्रतिक्रियेमुळे सोशल मीडियावर मोठी चर्चा रंगली असून बादशाहला नेटकऱ्यांच्या ट्रोलिंगला सामोरे जावे लागत आहे.

‘इंडियाज गॉट लेटेंट’च्या सीझन २मधील हा दुसरा बोनस एपिसोड आहे. या भागात बादशाहसोबत प्रसिद्ध होस्ट आणि लेखक हर्ष लिंबाचिया, लोकप्रिय डिजिटल क्रिएटर सौरव जोशी आणि कॉमेडियन रजत सूद हेही परीक्षक म्हणून उपस्थित होते. शोचे नियमित भाग ओटीटी प्लॅटफॉर्म नेटफ्लिक्सवर दर १५ दिवसांनी स्ट्रीम केले जातात. त्याउलट, विशेष बोनस एपिसोड कोणत्याही निश्चित कालमर्यादेशिवाय केवळ यूट्यूब मेंबर्ससाठी प्रदर्शित केले जातात. यापूर्वी २७ जुलै २०२६ रोजी प्रदर्शित झालेल्या पहिल्या बोनस एपिसोडमध्ये राघव जुयाल, निहारिका एनएम, रोहन जोशी आणि मुनव्वर फारुकी यांसारख्या प्रसिद्ध व्यक्ती सहभागी झाल्या होत्या.