सुळेंच्या लेकीच्या रिसेप्शनमध्ये मोदींचा सवाल, प्रियांकांचं उत्तर अन् खडगेंचा टोला video
Total Views |
नवी दिल्ली,
Modi at Sule's daughter's reception राष्ट्रवादी काँग्रेसच्या शरद पवार गटाच्या खासदार सुप्रिया सुळे यांच्या कन्या रेवती सुळे यांच्या विवाह स्वागत समारंभात देशातील प्रमुख राजकीय नेते एकाच ठिकाणी दिसले. पंतप्रधान नरेंद्र मोदी, केंद्रीय गृहमंत्री अमित शाह, काँग्रेस नेत्या सोनिया गांधी, राहुल गांधी, प्रियांका गांधी आणि समाजवादी पक्षाचे प्रमुख अखिलेश यादव यांच्यासह अनेक नेत्यांनी या सोहळ्याला उपस्थिती लावली. या निमित्ताने सत्ताधारी आणि विरोधकांमधील नेत्यांच्या भेटीगाठींची चांगलीच चर्चा रंगली. रेवती सुळे या सुप्रिया सुळे यांच्या कन्या आणि शरद पवार यांच्या नात आहेत. त्यांचा विवाह सारंग लखानी यांच्याशी झाला आहे. स्वागत समारंभात शरद पवार स्वतः पाहुण्यांचे स्वागत करताना दिसले. यावेळी पंतप्रधान नरेंद्र मोदी आणि अमित शाह यांचीही उपस्थिती होती. मोदी आणि शरद पवार यांच्यात झालेल्या संवादाचे क्षणही चर्चेचा विषय ठरले.
कार्यक्रमातील आणखी एक प्रसंग राजकीय वर्तुळाचे लक्ष वेधून घेणारा ठरला. पंतप्रधान नरेंद्र मोदी यांची राहुल गांधी, प्रियांका गांधी आणि काँग्रेस अध्यक्ष मल्लिकार्जुन खडगें यांच्यासोबत भेट झाली. यावेळी मोदी यांनी प्रियांका गांधी यांना पाहत, “प्रियांकाजी, तुम्ही कशा आहात?” अशी विचारणा केल्याचे वृत्त आहे. त्यावर प्रियांका गांधी यांनी हसत आपण ठीक असल्याचे सांगत मोदींचीही विचारपूस केली. यानंतर मोदी यांनी आपण “आहे तसाच आहे” अशी प्रतिक्रिया दिली. त्यावर मल्लिकार्जुन खडगें यांनी मिश्कीलपणे “भाई साहब थोड़ा सा बदल गए हैं” अशी टिप्पणी केल्याचे वृत्त आहे. खडगे यांच्या या प्रतिक्रियेनंतर मोदी हसले आणि त्यांनी खडगें यांना टाळी देत प्रतिक्रिया दिली. या हलक्याफुलक्या संवादाचा व्हिडिओ आणि छायाचित्रांमुळे कार्यक्रमातील हा प्रसंग चर्चेत आला.
या संपूर्ण सोहळ्यामुळे राजकीय मतभेद बाजूला ठेवून विविध पक्षांतील नेते एकाच व्यासपीठावर आल्याचे चित्र पाहायला मिळाले. त्यामुळे रेवती सुळे यांच्या स्वागत समारंभाची चर्चा केवळ कौटुंबिक कार्यक्रम म्हणून न होता राजकीय वर्तुळातही मोठ्या प्रमाणावर झाली. दरम्यान, स्वागत समारंभाच्या आधी सुप्रिया सुळे यांनी त्यांच्या पक्षाच्या आठ खासदारांसह पंतप्रधान नरेंद्र मोदी यांची भेट घेतली. ही भेट सुमारे २० मिनिटे चालल्याचे वृत्त आहे. या भेटीत मतदारसंघ पुनर्रचना विधेयकासह विविध मुद्द्यांवर चर्चा झाल्याचे सांगण्यात आले. यापूर्वी २२ जुलै रोजी शरद पवार आणि सुप्रिया सुळे यांनी दिल्लीत पंतप्रधान मोदी यांची भेट घेतली होती. त्यामुळे एका कौटुंबिक सोहळ्याच्या निमित्ताने पंतप्रधान नरेंद्र मोदी, अमित शाह, शरद पवार, राहुल गांधी, प्रियांका गांधी आणि मल्लिकार्जुन खरगे यांसारखे प्रमुख नेते एकत्र आल्याने या भेटीगाठींना राजकीय महत्त्व प्राप्त झाले आहे. मात्र, कार्यक्रमातील संवाद हा कौटुंबिक वातावरणातील सौहार्दपूर्ण भेटीचा भाग असल्याचेही वृत्तांतून स्पष्ट होते.