वेदरल्डने घरच्या मैदानावर रचला विक्रम!
Total Views |
नवी दिल्ली,
jake-weatherald : प्रत्येक खेळाडू आपल्या जन्मगावी कसोटी क्रिकेट खेळण्याचे स्वप्न पाहतो, पण जेक वेदरॉल्डसाठी हा क्षण केवळ स्वप्नपूर्ती नव्हता. डार्विनमध्ये बांगलादेशविरुद्धच्या पहिल्या कसोटीत ऑस्ट्रेलियाच्या डावाची सुरुवात करताना वेदरॉल्डने एक अनोखा विक्रम रचला. नॉर्दर्न टेरिटरीमध्ये जन्मलेला आणि वाढलेला तो आपल्या जन्मगावी कसोटी खेळणारा पहिला खेळाडू ठरला. तथापि, तो या संस्मरणीय प्रसंगाचे मोठ्या खेळीत रूपांतर करू शकला नाही आणि २३ धावा करून पॅव्हेलियनमध्ये परतला.
ऑस्ट्रेलिया आणि बांगलादेश यांच्यातील पहिली कसोटी डार्विनमध्ये खेळली जात आहे. ३१ वर्षीय फलंदाज वेदरॉल्डला ऑस्ट्रेलियाच्या डावाची सुरुवात करण्याची संधी देण्यात आली. आपल्या घरच्या मैदानावर पाऊल ठेवताच त्याने इतिहासात आपले नाव कोरले. वेदरॉल्डची ही सहावी कसोटी होती. तथापि, आपल्या घरच्या मैदानावर संस्मरणीय खेळी करण्याच्या त्याच्या आशा हसन महमूदने धुळीस मिळवल्या. या बांगलादेशी वेगवान गोलंदाजाने वेदरॉल्डला ३७ चेंडूंमध्ये २३ धावांवर बाद केले. त्याने काही चांगले फटके मारले असले तरी, तो जास्त वेळ क्रीजवर टिकू शकला नाही.
हसन महमूदने दोन षटकांत दोन मोठे धक्के दिले
बांग्लादेशकडून खेळणाऱ्या हसन महमूदने ऑस्ट्रेलियाला सलग दोन षटकांत दोन मोठे धक्के दिले. प्रथम, त्याने जेक वेदरॉल्डला बाद केले आणि पुढच्याच षटकात त्याने ट्रॅव्हिस हेडला बाद केले. ट्रॅव्हिस हेड ३९ चेंडूंमध्ये २२ धावा करून बाद झाला, तर वेदरॉल्डने ३७ चेंडूंमध्ये २३ धावा केल्या. वेदरॉल्ड बाद झाल्यानंतर, ऑस्ट्रेलियाची धावसंख्या १७ षटकांत दोन गडी बाद ५५ अशी झाली. मायदेशात इतिहास रचूनही, वेदरॉल्डचा कसोटी डाव लहान ठरला, पण डार्विनमध्ये कसोटी खेळणारा नॉर्दर्न टेरिटरीमध्ये जन्मलेला आणि वाढलेला तो पहिला खेळाडू म्हणून त्याने विक्रमांच्या पुस्तकात आपले नाव नोंदवले.
बांग्लादेश आणि ऑस्ट्रेलिया यांच्यातील पहिल्या कसोटी सामन्याबद्दल बोलायचे झाल्यास, बांग्लादेशी गोलंदाजांनी दुपारच्या जेवणापर्यंत उत्कृष्ट कामगिरी केली. बांगलादेशने ऑस्ट्रेलियाच्या चार फलंदाजांना ७४ धावांत बाद केले. स्टीव्ह स्मिथ ७ धावांवर क्रीजवर टिकून होता. आता सगळ्यांची नजर दुसऱ्या सत्रातील खेळावर असेल.