बनावट नोटांच्या रॅकेटचा पर्दाफाश

nashik fake currency racket नाशिक-त्र्यंबकेश्वर मार्गावरील तळेगाव परिसरात बनावट चलनी नोटांच्या कथित व्यवहाराचा पर्दाफाश करण्यात नाशिक ग्रामीण आणि शहर पोलिसांना यश आले आहे. एका बंगल्यात सुरू असलेल्या या कथित रॅकेटवर पोलिसांनी संयुक्त कारवाई करत पाच संशयितांना अटक केली. घटनास्थळावरून बनावट चलनी नोटांसह त्या तयार करण्यासाठी वापरले जाणारे साहित्यही जप्त करण्यात आले आहे.

 

 

पोलिसांच्या माहितीनुसार, संबंधित टोळीकडून नागरिकांना मोठ्या रकमेच्या बदल्यात त्यापेक्षा अधिक मूल्याच्या बनावट नोटा देण्याचे आमिष दाखवले जात होते. 10 लाख रुपयांच्या खऱ्या नोटांच्या बदल्यात 30 लाख रुपयांच्या बनावट नोटा देण्याचा प्रस्ताव संशयितांकडून ठेवण्यात आल्याचे प्राथमिक तपासात समोर आले आहे. अशाच एका कथित व्यवहाराची माहिती पोलिसांना मिळाल्यानंतर पथकाने सापळा रचला.

ठरलेल्या ठिकाणी कथित व्यवहार सुरू असताना पोलिसांनी कारवाई करत संशयितांना ताब्यात घेतले. त्यानंतर तळेगाव येथील एका बंगल्याची झडती घेण्यात आली. या झडतीदरम्यान पोलिसांना बनावट चलनी नोटा तसेच त्या तयार करण्यासाठी वापरले जाणारे विविध साहित्य आढळून आले. त्यामुळे बंगल्यातच बनावट नोटा तयार करण्याचे काम सुरू असल्याचा पोलिसांचा प्राथमिक अंदाज आहे.

पोलिसांच्या प्राथमिक तपासानुसार, संशयित चलनी नोटांसारख्या दिसणाऱ्या बनावट नोटा तयार करून त्यांचा आर्थिक व्यवहारांमध्ये वापर करण्याचा प्रयत्न करत होते. मात्र, या बनावट नोटा नेमक्या कोणत्या पद्धतीने तयार केल्या जात होत्या, याबाबत पोलिसांनी अद्याप सविस्तर माहिती सार्वजनिक केलेली नाही. या प्रकरणाचा पुढील तपास सुरू आहे.

या कारवाईत अटक करण्यात आलेल्या संशयितांमध्ये अमरेश्वर आईथा आणि दासरी सत्यइ यांचा समावेश असून, हे दोघे तेलंगणातील रहिवासी असल्याची माहिती पोलिसांनी दिली आहे. गोकुळ दाते आणि हिरामण दाते हे तळेगाव, नाशिक येथील रहिवासी आहेत, तर मच्छिंद्र घनदाट हा सातपूर परिसरातील रहिवासी असल्याचे पोलिसांनी सांगितले. जप्त करण्यात आलेल्या बनावट नोटा आणि साहित्याच्या आधारे या कथित रॅकेटची व्याप्ती तसेच त्यामागील इतर व्यक्तींचा सहभाग तपासला जात आहे.