स्नायपर ते क्षेपणास्त्र; ट्रम्प यांच्या हत्येचा इराणी कट?

Iranian plot to assassinate Trump अमेरिकेचे राष्ट्राध्यक्ष डोनाल्ड ट्रम्प यांच्या जीवाला इराणकडून धोका असल्याची माहिती इस्रायलने अमेरिकेला आधीच दिली होती, असा दावा समोर आला आहे. स्नायपर, चाकू तसेच खांद्यावरून डागता येणाऱ्या क्षेपणास्त्रांच्या माध्यमातून ट्रम्प यांच्यावर हल्ला केला जाऊ शकतो, असा इशारा इस्रायली गुप्तचर यंत्रणेकडून देण्यात आल्याचे सांगितले जात आहे.१४ ऑगस्ट २०२६ रोजी समोर आलेल्या माहितीनुसार, हे इशारे अमेरिकेच्या गुप्तचर यंत्रणांसोबतच काही प्रकरणांमध्ये थेट व्हाईट हाऊसमधील वरिष्ठ अधिकाऱ्यांपर्यंत पोहोचवण्यात आले होते. त्यातील सर्वात सविस्तर इशारा जुलैमध्ये ट्रम्प यांच्या तुर्की दौऱ्यापूर्वी देण्यात आल्याचे सूत्रांनी सांगितले.

 

 

 

 

अमेरिकेतील एका अधिकाऱ्यासह या प्रकरणाची माहिती असलेल्या आणखी एका व्यक्तीच्या माहितीनुसार, अंकारा येथे होणाऱ्या नाटो शिखर परिषदेसाठी ट्रम्प तुर्कीला जाण्यापूर्वी इस्रायली अधिकाऱ्यांनी व्हाईट हाऊसला संभाव्य हल्ल्याबाबत सावध केले होते. ट्रम्प एअर फोर्स वनमधून प्रवास करत असताना इराणकडून खांद्यावरून डागता येणाऱ्या क्षेपणास्त्राचा वापर करून हल्ला होण्याची शक्यता असल्याचे या इशाऱ्यात नमूद करण्यात आल्याचे सांगितले जाते.या माहितीची पूर्णपणे स्वतंत्रपणे पडताळणी झालेली नसतानाही अमेरिकेच्या व्हाईट हाऊस आणि सिक्रेट सर्व्हिसने ट्रम्प यांच्या सुरक्षेसाठी अतिरिक्त उपाययोजना केल्या. तुर्की दौऱ्यादरम्यान ट्रम्प यांना एअर फोर्स वनमधून दुसऱ्या विमानात हलवण्यात आले. ही संपूर्ण प्रक्रिया सुरक्षा यंत्रणांनी फसव्या हालचालींचा भाग म्हणून राबवल्याचे सूत्रांचे म्हणणे आहे.

 

 

इराणकडून ट्रम्प यांना लक्ष्य करण्यामागे २०२० मध्ये अमेरिकेच्या ड्रोन हल्ल्यात ठार झालेल्या इराणी लष्करी कमांडर कासिम सुलेमानी यांच्या मृत्यूचा बदला घेण्याची भावना असल्याचा अमेरिकेच्या गुप्तचर यंत्रणांचा दीर्घकाळापासून अंदाज आहे. मात्र, गेल्या वर्षाच्या सुरुवातीपासून इस्रायली गुप्तचर यंत्रणेकडून ट्रम्प यांच्या जीवाला असलेल्या विशिष्ट धोक्यांबाबत मिळालेल्या माहितीची सीआयएला पुष्टी करता आलेली नसल्याचे अधिकाऱ्यांनी सांगितले. इराणविरोधातील दोन अमेरिकी लष्करी मोहिमांच्या काळातही इराणकडून असलेल्या धोक्यांबाबत इस्रायलकडून देण्यात आलेल्या गुप्तचर माहितीवर सीआयएचा विश्वास तुलनेने कमी होता, अशी माहिती एका माजी अमेरिकी अधिकाऱ्यासह या प्रकरणाची माहिती असलेल्या व्यक्तीने दिली. ट्रम्प प्रशासनात हे मूल्यांकन किती व्यापक पातळीवर पोहोचले होते, हे मात्र स्पष्ट झालेले नाही.

 

या प्रकरणामुळे इराणच्या धोक्याबाबत अमेरिका आणि इस्रायलच्या गुप्तचर यंत्रणांच्या आकलनातील फरकही समोर आला आहे. या वर्षाच्या सुरुवातीला अमेरिकी गुप्तचर संस्थांनी इराण सक्रियपणे अण्वस्त्र विकसित करत नसल्याचा निष्कर्ष काढला होता. दुसरीकडे, इस्रायलने तेहरानकडून तातडीचा धोका असल्याचा दावा केला होता. या पार्श्वभूमीवर ट्रम्प यांनी फेब्रुवारीमध्ये इराणवर लष्करी हल्ले केले. दरम्यान, ट्रम्प यांच्या तुर्की दौऱ्याच्या काळात निर्माण झालेल्या कथित धोक्याची तुर्कीच्या गुप्तचर यंत्रणेने स्वतंत्रपणे पुष्टी केली नव्हती. एका तुर्की अधिकाऱ्याच्या म्हणण्यानुसार, ट्रम्प यांना इराणकडून लक्ष्य केले जाणार असल्याच्या इस्रायली इशाऱ्याला पुष्टी देणारा कोणताही पुरावा तुर्की गुप्तचर यंत्रणांकडे नव्हता. ही बाब अमेरिकी अधिकाऱ्यांनाही कळवण्यात आली होती. तरीही, इराण आणि अमेरिका-इस्रायल यांच्यातील तणावाच्या काळात ट्रम्प यांच्या सुरक्षेबाबत घेतल्या जाणाऱ्या निर्णयांवर इस्रायली गुप्तचर यंत्रणेच्या माहितीचा किती प्रभाव पडत होता, हे या प्रकरणातून स्पष्ट होत असल्याचे दिसून येते.