सिंधू पाण्यावरून पाकिस्तानचा थयथयाट!

Shahbaz Sharif's warning to India पाकिस्तानच्या स्वातंत्र्यदिनाच्या पार्श्वभूमीवर पंतप्रधान शाहबाज शरीफ यांनी भारताविरोधात आक्रमक भूमिका मांडली आहे. भारताने घेतलेल्या सिंधू पाणी कराराबाबतच्या निर्णयाचा संदर्भ देत त्यांनी पाकिस्तानच्या सार्वभौमत्वाला किंवा सुरक्षेला धोका निर्माण झाल्यास अधिक कठोर प्रत्युत्तर देण्याचा इशारा दिला. पहलगाम दहशतवादी हल्ल्यानंतर भारताने केलेल्या ऑपरेशन सिंदूरचा उल्लेखही त्यांच्या भाषणातून करण्यात आला.पाकिस्तानच्या स्वातंत्र्याच्या ८०व्या वर्धापन दिनाच्या पूर्वसंध्येला इस्लामाबादमध्ये ‘यादगार-ए-फतेह’ या स्मारकाचे उद्घाटन करण्यात आले. राष्ट्रपती आसिफ अली झरदारी आणि पंतप्रधान शाहबाज शरीफ यांच्या उपस्थितीत हा कार्यक्रम पार पडला. पाकिस्तानसाठी बलिदान देणाऱ्या सैनिकांच्या स्मरणार्थ आणि ‘मरका-ए-हक’च्या स्मृतीसाठी हे स्मारक उभारण्यात आल्याचे पाकिस्तानकडून सांगण्यात आले.

 

 

 

 

स्वातंत्र्यदिनाच्या शुभेच्छा देत शाहबाज शरीफ यांनी आपल्या भाषणाची सुरुवात केली. मात्र, त्यानंतर त्यांनी भारताच्या धोरणांवरून आक्रमक सूर लावला. भारताने सिंधू पाणी करार एकतर्फीपणे स्थगित केल्याचा आरोप करत त्यांनी या निर्णयावर तीव्र नाराजी व्यक्त केली.पाण्याच्या मुद्द्यावर पाकिस्तानची भूमिका स्पष्ट करताना शाहबाज शरीफ यांनी भारताला थेट इशारा दिला. “पाण्याचा प्रत्येक थेंब आमच्यासाठी एक धोकादायक रेषा आहे,” असे ते म्हणाले. भारताने योग्य मार्ग स्वीकारला नाही, तर पाकिस्तानकडून थेट प्रत्युत्तर दिले जाईल, असा इशाराही त्यांनी दिला.

 

 

ऑपरेशन सिंदूरच्या पार्श्वभूमीवरही शाहबाज शरीफ यांनी भाष्य केले. पहलगाम दहशतवादी हल्ल्याला प्रत्युत्तर म्हणून भारताने पाकिस्तान आणि पाकिस्तानव्याप्त भागातील दहशतवादी ठिकाणांवर कारवाई केली होती. या कारवाईचा उल्लेख करत पाकिस्तानच्या पंतप्रधानांनी आपल्या भाषणातून भारताविरोधातील नाराजी व्यक्त केली.या कार्यक्रमाला पाकिस्तानचे राष्ट्रपती, पंतप्रधान, संरक्षण क्षेत्रातील वरिष्ठ अधिकारी आणि लष्करप्रमुख फील्ड मार्शल असिम मुनीर यांच्यासह हवाई दल प्रमुख एअर चीफ मार्शल झहीर अहमद बाबर सिद्धू आणि नौदल प्रमुख ॲडमिरल नवीद अश्रफ उपस्थित होते.

 

 

‘यादगार-ए-फतेह’ स्मारकाच्या उद्घाटनावेळी पाकिस्तानने देशासाठी प्राणांचे बलिदान देणाऱ्या सैनिकांना आदरांजली वाहिली. त्याचवेळी शाहबाज शरीफ यांनी पाकिस्तानची ओळख शांततेला प्राधान्य देणारा देश म्हणून असल्याचे सांगितले. मात्र, देशाच्या सार्वभौमत्वाला आणि सुरक्षेला आव्हान दिल्यास पाकिस्तान कठोर भूमिका घेईल, असा संदेशही त्यांनी दिला. भारत-पाकिस्तान संबंधांमध्ये आधीच तणावाचे वातावरण असताना शाहबाज शरीफ यांच्या या वक्तव्यामुळे दोन्ही देशांमधील संघर्षाच्या पार्श्वभूमीवर पुन्हा चर्चा सुरू झाली आहे. विशेषतः सिंधू पाणी करार आणि ऑपरेशन सिंदूरनंतर निर्माण झालेला तणाव या वक्तव्यामुळे अधिक ठळकपणे समोर आला आहे.