‘स्पायडर-मॅन’ची कमाई मंदावली

spider mans earnings slow down टॉम हॉलंडच्या प्रमुख भूमिकेतील ‘स्पायडर-मॅन: ब्रँड न्यू डे’ने भारतीय बॉक्स ऑफिसवर दमदार कामगिरी सुरू ठेवली आहे. प्रदर्शनाला १५ दिवस पूर्ण झाल्यानंतरही चित्रपटाची कमाई मजबूत असून, भारतात ४०० कोटी रुपयांचा टप्पा पार करणारा पहिला हॉलिवूड चित्रपट ठरण्याचा विक्रम त्याने आपल्या नावावर केला आहे. मात्र, तिसऱ्या आठवड्यात प्रवेश करताना चित्रपटाच्या दैनंदिन कमाईत काहीशी घट झाली आहे.प्रदर्शनाच्या १५व्या दिवशी म्हणजेच तिसऱ्या गुरुवारी ‘स्पायडर-मॅन: ब्रँड न्यू डे’ने सर्व भाषांमध्ये मिळून ५ कोटी रुपयांची निव्वळ कमाई केल्याचे सॅकनिल्कच्या सुरुवातीच्या ट्रेंड रिपोर्टमध्ये नमूद करण्यात आले आहे. या कमाईनंतर चित्रपटाची भारतातील १५ दिवसांची एकूण निव्वळ कमाई ४४१ कोटी रुपयांवर पोहोचली आहे.

 

  

पहिल्या दोन आठवड्यांत चित्रपटाने सातत्याने कोट्यवधींची कमाई करत भारतीय प्रेक्षकांमध्ये आपली पकड मजबूत केली. त्यामुळे हा चित्रपट भारतीय बॉक्स ऑफिसवरील सर्वाधिक कमाई करणाऱ्या हॉलिवूड चित्रपटांच्या यादीत आघाडीवर पोहोचला आहे. तिसऱ्या आठवड्यात मात्र त्याच्या कमाईवर नवीन चित्रपटांच्या प्रदर्शनाचा परिणाम दिसून येत आहे.शुक्रवारपासून सनी देओलचा ‘बंटवारा १९४७’ आणि इम्रान हाश्मीचा ‘अवारपन २’ हे दोन बॉलिवूड चित्रपट प्रेक्षकांच्या भेटीला आले आहेत. त्यामुळे ‘स्पायडर-मॅन: ब्रँड न्यू डे’समोर आता बॉक्स ऑफिसवर नवी स्पर्धा निर्माण झाली आहे. या पार्श्वभूमीवर तिसऱ्या गुरुवारी चित्रपटाने आतापर्यंतची सर्वात कमी दैनंदिन कमाई नोंदवली.तरीही चित्रपटाच्या एकूण कामगिरीवर त्याचा फारसा परिणाम झालेला दिसत नाही. ४४१ कोटी रुपयांची कमाई केल्यानंतर आता ‘स्पायडर-मॅन: ब्रँड न्यू डे’ ४५० कोटींच्या टप्प्यापासून अवघ्या ९ कोटी रुपयांनी दूर आहे. तिसऱ्या आठवड्याच्या अखेरीस हा टप्पा गाठण्याची शक्यता व्यक्त केली जात आहे.