मी घाबरत नाही…हल्ल्यानंतर सुखबीर बादल यांचा इशारा!

Sukhbir Badal's warning after the attack नांदेड येथे झालेल्या हल्ल्यानंतर शिरोमणी अकाली दलाचे प्रमुख सुखबीर सिंग बादल यांनी प्रथमच आपली भूमिका स्पष्ट केली आहे. हल्ल्याच्या दुसऱ्याच दिवशी बोलताना त्यांनी पंजाबमधील शांतता आणि सामाजिक सलोखा बिघडवण्याचा प्रयत्न करणाऱ्या शक्तींना कधीही यशस्वी होऊ देणार नसल्याचा ठाम इशारा दिला. “मी घाबरत नाही. पंजाब आणि देशाचा विकास आमच्यासाठी सर्वोच्च आहे. जातीय आणि धार्मिक सलोखाही तितकाच महत्त्वाचा आहे,” असे त्यांनी स्पष्ट केले.आपले वडील आणि पंजाबचे माजी मुख्यमंत्री प्रकाश सिंग बादल यांच्या भूमिकेचा दाखला देत सुखबीर यांनी सांगितले की, त्यांच्या वडिलांनी अशा शक्तींशी कधीही तडजोड केली नाही. विविध समाजघटक आणि प्रदेशांतील लोकांनी एकत्रितपणे शांततेत राहावे, यासाठी त्यांनी नेहमी प्रयत्न केले. मुख्यमंत्री असतानाही प्रकाश सिंग बादल यांनी जातीय सलोखा आणि सर्व प्रदेशांचा समान सन्मान कायम ठेवला, असे सुखबीर यांनी नमूद केले.

 

 

 

आपल्यावर यापूर्वीही अशाच प्रकारचे हल्ल्याचे प्रयत्न झाले असल्याचा दावा सुखबीर बादल यांनी केला. वर्षभरापूर्वी आपल्याला लक्ष्य करण्याचा प्रयत्न करणाऱ्या त्याच शक्तींनी पुन्हा तसाच प्रकार केल्याचा आरोप त्यांनी केला. पंजाबमधील परिस्थिती अस्थिर करून शांतता भंग करणे हा या शक्तींचा उद्देश असल्याचे त्यांनी म्हटले. मात्र, शिरोमणी अकाली दलाचा अध्यक्ष म्हणून पंजाबमध्ये असे वातावरण निर्माण होऊ देणार नसल्याचे त्यांनी ठामपणे सांगितले.नांदेडमधील तख्त हजूर साहिब येथील घटनेचा संदर्भ देताना सुखबीर बादल यांनी यापूर्वी सुवर्ण मंदिरात झालेल्या हल्ल्याच्या प्रयत्नाचाही उल्लेख केला. आपल्या दोन्ही घटनांचा संबंध पवित्र धार्मिक स्थळांशी असल्याचे त्यांनी सांगितले. मात्र, या घटनांमुळे आपण विचलित झालेलो नसल्याचा संदेश त्यांनी दिला.

 

 

“गुरु साहिबांचा हात डोक्यावर असेल तर कोणीही काही करू शकत नाही,” असा विश्वास व्यक्त करत सुखबीर बादल यांनी आपल्या भूमिकेवर ठाम असल्याचे सांगितले. कितीही प्रयत्न झाले तरी अखेरीस सर्व काही देवाच्या हातात असल्याचेही त्यांनी म्हटले. नांदेडमधील हल्ल्यानंतर सुखबीर बादल यांच्या या वक्तव्यामुळे पंजाबमधील शांतता, धार्मिक सलोखा आणि राजकीय स्थैर्याचा मुद्दा पुन्हा चर्चेत आला आहे. हल्ल्याच्या पार्श्वभूमीवर त्यांनी भीतीला बळी न पडता पंजाबच्या विकासाला आणि सामाजिक एकतेला प्राधान्य देण्याची भूमिका मांडली आहे.