माजी उपसभापती आशीष बॅनर्जी यांचा मृतदेह टीएमसी कार्यालयात फासावर
Total Views |
कोलकाता
ashish banerjee death पश्चिम बंगाल विधानसभा अध्यक्षांचे माजी उपसभापती आणि तृणमूल काँग्रेसचे (TMC) ज्येष्ठ नेते आशीष बॅनर्जी यांचा मृतदेह बीरभूम जिल्ह्यातील रामपूरहाट येथील टीएमसीच्या पक्ष कार्यालयात फासावर लटकलेल्या अवस्थेत आढळून आल्याने खळबळ उडाली आहे. बॅनर्जी यांच्या मृत्यूची बातमी समोर येताच पक्ष कार्यालयाबाहेर मोठी गर्दी जमा झाली. पोलिसांनी घटनास्थळी पोहोचून मृतदेह ताब्यात घेतला असून, या प्रकरणाचा तपास सुरू केला आहे. पोलिसांनी मृतदेह शवविच्छेदनासाठी पाठविला आहे.
बीरभूम जिल्ह्यातील रामपूरहाट शहरात बॅनर्जी यांच्या घरालगतच टीएमसीचे पक्ष कार्यालय आहे. याच कार्यालयात त्यांचा मृतदेह फासावर लटकलेल्या अवस्थेत आढळला. त्यांच्या मृत्यूची माहिती परिसरात पसरताच मोठी खळबळ उडाली. त्यांच्या मृत्यूमागील नेमकी परिस्थिती अद्याप स्पष्ट झालेली नाही.
७४ वर्षीय आशीष बॅनर्जी हे टीएमसीचे ज्येष्ठ नेते होते. त्यांनी रामपूरहाट विधानसभा मतदारसंघातून २००१ ते २०२१ या कालावधीत सलग पाच वेळा विजय मिळविला होता. मात्र, यावर्षी झालेल्या विधानसभा निवडणुकीत त्यांना भारतीय जनता पक्षाचे (BJP) उमेदवार ध्रुबा साहा यांच्याकडून सुमारे २४ हजार मतांनी पराभव स्वीकारावा लागला. भारत निवडणूक आयोगाच्या (ECI) आकडेवारीनुसार, बॅनर्जी यांना ८७,६८७ मते मिळाली, तर ध्रुबा साहा यांना १,११,९२० मते मिळाली. साहा यांनी रामपूरहाट मतदारसंघातून विजय मिळविला.
आशीष बॅनर्जी हे रामपूरहाटमधील हट्टालापारा परिसरात राहत होते. त्यांच्या निवासस्थानाजवळच असलेल्या पक्ष कार्यालयात त्यांचा मृतदेह आढळल्याने परिसरात तणावाचे वातावरण निर्माण झाले. घटनेनंतर पोलिसांनी परिसराची पाहणी करून तपासाला सुरुवात केली आहे.
बॅनर्जी यांनी जुलै २०२१ ते मे २०२६ या कालावधीत पश्चिम बंगाल विधानसभेचे १३ वे उपसभापती म्हणून काम पाहिले. रामपूरहाट येथे जन्मलेल्या बॅनर्जी यांनी बर्दवान विद्यापीठातून पीएचडी मिळवली होती. तसेच त्यांनी रामपूरहाट महाविद्यालयात सहयोगी प्राध्यापक म्हणूनही काम केले होते.दरम्यान, रामपूरहाटमधील त्यांच्या निवासस्थानाजवळ असलेल्या पक्ष कार्यालयातून कथित ‘सुसाइड नोट’ही सापडल्याची माहिती सूत्रांनी दिली आहे. मात्र, या कथित चिठ्ठीत नेमके काय नमूद आहे आणि आशीष बॅनर्जी यांच्या मृत्यूमागील परिस्थिती काय होती, हे अद्याप स्पष्ट झालेले नाही. पोलिसांच्या तपासानंतरच या प्रकरणातील अधिक माहिती समोर येण्याची शक्यता आहे.