चंबळच्या रौद्र प्रवाहात स्टीमर वाहून गेले...१०० जणांचा जीव धोक्यात

steamer was swept away in Chambal मोरेना जिल्ह्यात चंबळ नदीच्या रौद्र प्रवाहामुळे मोठी दुर्घटना टळण्याची भीती निर्माण झाली आहे. नदीतून १०० हून अधिक प्रवाशांना घेऊन जाणारे स्टीमर नदीच्या मध्यभागी अचानक नादुरुस्त झाले. त्यानंतर जोरदार प्रवाहामुळे स्टीमर वाहत जात असल्याची धक्कादायक माहिती समोर आली आहे. या स्टीमरमध्ये प्रवाशांसोबत ५० हून अधिक दुचाकी वाहनेही असल्याचे सांगण्यात येत आहे.मिळालेल्या माहितीनुसार, आज सकाळी ९:३० वाजण्याच्या सुमारास मोरेना जिल्ह्यातील नागरा सहसपुरा घाटावरून हे स्टीमर उत्तर प्रदेशातील केला घाटाच्या दिशेने निघाले होते. नदीच्या मध्यभागी पोहोचल्यानंतर अचानक स्टीमर बंद पडले. चालकांनी ते पुन्हा सुरू करण्यासाठी प्रयत्न केले, मात्र त्यांना यश आले नाही. त्याचवेळी चंबळ नदीचा वेगवान प्रवाह असल्याने स्टीमर हळूहळू प्रवाहासोबत वाहून जाऊ लागले.

 

 

 

स्टीमरवरील काही प्रवाशांनी आपल्या कुटुंबीयांना फोन करून आपण स्टीमरसोबत वाहत असल्याची माहिती दिल्याने त्यांच्या नातेवाईकांमध्ये भीतीचे वातावरण निर्माण झाले. स्टीमरमध्ये डिझेल संपल्यामुळे इंजिन बंद पडल्याची चर्चाही सुरू आहे. मात्र, या कारणाला अद्याप अधिकृत दुजोरा मिळालेला नाही.चंबळ नदीतील पाण्याची खोली आणि प्रवाहाचा वेग अधिक असल्याने स्टीमरला रोखणे कठीण झाले. सहसपुरा घाटावर उपस्थित असलेल्या नागरिकांनी स्टीमरला दोन किलोमीटरपेक्षा अधिक अंतरापर्यंत नदीच्या प्रवाहात वाहत जाताना पाहिल्याचे सांगितले. मात्र, त्यानंतर अवघ्या अर्ध्या तासात स्टीमर नजरेआड झाले. घटनेची माहिती मिळताच पोलीस अधिकारी घटनास्थळी दाखल झाले असून परिस्थितीवर लक्ष ठेवले जात आहे.

 

 

स्टीमरमधील बहुतांश प्रवासी उत्तर प्रदेशातील बटेश्वर येथे कावड अर्पण करण्यासाठी निघालेले यात्रेकरू असल्याची माहिती आहे. नागरा येथील सहसपुरा घाटावरून चंबळ नदी पार करण्यासाठी हे प्रवासी स्टीमरमध्ये बसले होते. मात्र, नदीच्या मध्यभागी स्टीमर बंद पडल्याने त्यांच्या जीवाला धोका निर्माण झाला. दरम्यान, अलीकडेच बुरहानपूरमध्ये सुक्ता नदीच्या वाढलेल्या प्रवाहात एका वृद्ध मेंढपाळासह त्याच्या बकऱ्या अडकल्या होत्या. त्यावेळी गावकऱ्यांनी प्रयत्न करून वृद्ध मेंढपाळाची सुखरूप सुटका केली होती. चंबळमधील या घटनेमुळे नदीच्या वाढलेल्या प्रवाहाचा धोका पुन्हा एकदा समोर आला आहे.