हेडन पॅनेटियर यांचे वयाच्या ३६व्या वर्षी निधन

Hayden Panettiere प्रसिद्ध अमेरिकन अभिनेत्री हेडन पॅनेटियर यांचे वयाच्या ३६व्या वर्षी निधन झाले आहे. ‘Heroes’ आणि ‘Nashville’ या लोकप्रिय मालिकांमधील भूमिकांमुळे त्या घराघरात पोहोचल्या होत्या. हेडन यांच्या निधनाची त्यांच्या प्रतिनिधींनी पुष्टी केली असून, ही बातमी समोर आल्यानंतर हॉलिवूडमध्ये शोककळा पसरली आहे.

हेडन पॅनेटियर यांचा मृत्यू त्यांच्या ३७व्या वाढदिवसाच्या अवघ्या पाच दिवस आधी झाला. त्या २१ ऑगस्ट रोजी आपला वाढदिवस साजरा करणार होत्या. मात्र, त्याआधीच त्यांच्या निधनाची दुःखद बातमी समोर आली. त्यांच्या मृत्यूचे नेमके कारण अद्याप जाहीर करण्यात आलेले नाही.

 

 

हेडन यांच्या प्रतिनिधींनी अभिनेत्रीच्या निधनाची माहिती देताना दुःख व्यक्त केले. “अत्यंत दुःखाने आम्ही आमच्या लाडक्या हेडनच्या दुःखद निधनाची घोषणा करत आहोत,” असे त्यांच्या प्रतिनिधींनी म्हटले. हेडन यांनी आपल्या अभिनयातून केवळ चाहत्यांचीच नव्हे, तर आजूबाजूच्या लोकांचीही मने जिंकली होती. त्यांच्या निधनाने कुटुंबीय, सहकलाकार आणि चाहते हळहळ व्यक्त करत आहेत.बालकलाकार म्हणून हेडन पॅनेटियर यांनी आपल्या अभिनय कारकिर्दीला सुरुवात केली होती. पुढे दूरचित्रवाणी तसेच चित्रपटांमध्ये विविध भूमिका साकारत त्यांनी हॉलिवूडमध्ये स्वतःची वेगळी ओळख निर्माण केली. ‘Heroes’ या सायन्स-फिक्शन ड्रामा मालिकेतील क्लेअर बेनेट ही भूमिका त्यांच्या कारकिर्दीतील महत्त्वाचा टप्पा ठरली. या भूमिकेमुळे त्यांना मोठी लोकप्रियता मिळाली. त्यानंतर ‘Nashville’ या म्युझिकल ड्रामामध्ये त्यांनी ज्युलिएट बार्न्सची भूमिका साकारली. २०१२ ते २०१८ या कालावधीत त्या या मालिकेचा भाग होत्या.

हेडन पॅनेटियर यांनी अनेक लोकप्रिय चित्रपटांमध्येही काम केले. ‘Remember the Titans’, ‘Raising Helen’, ‘Ice Princess’, ‘I Love You, Beth Cooper’, ‘Scream 4’ आणि ‘Scream 6’ या चित्रपटांचा त्यांच्या चित्रपट कारकिर्दीत समावेश आहे. याशिवाय ‘Amanda Knox’ या टेलिव्हिजन चित्रपटातही त्या दिसल्या होत्या.अभिनयासोबतच हेडन यांनी आपल्या वैयक्तिक आयुष्यातील अनेक अनुभवांवर आधारित ‘This Is Me – A Reckoning’ हे पुस्तकही लिहिले होते. हे पुस्तक यावर्षी मे महिन्यात प्रकाशित झाले. पुस्तकाच्या निमित्ताने दिलेल्या मुलाखतींमध्ये त्यांनी बालपणापासून मनोरंजनविश्वातील आपल्या प्रदीर्घ प्रवासापर्यंतच्या अनेक अनुभवांवर भाष्य केले होते.अवघ्या ३६व्या वर्षी हेडन पॅनेटियर यांच्या निधनाने त्यांच्या चाहत्यांना मोठा धक्का बसला आहे. त्यांनी साकारलेल्या भूमिका आणि त्यांच्या अभिनयाच्या आठवणी कायमच प्रेक्षकांच्या स्मरणात राहतील.