आसाममधील पूरग्रस्त प्राण्यांसाठी प्यार फाउंडेशनची मदत मोहीम

Pyar Foundation प्राणी मदतकार्याच्या क्षेत्रात एक महत्त्वपूर्ण उपक्रम राबवत चंद्रपूरस्थित प्यार फाउंडेशनने आसाममधील पूरग्रस्त भागात आपली 15 दिवसांची आपत्कालीन मदत मोहीम यशस्वीपणे पूर्ण केली. फाउंडेशनच्या 8 सदस्यीय विशेष पथकाने चंद्रपूरहून आसामपर्यंत जवळपास 2 हजार 500 किलोमीटरचा रस्ते प्रवास करून पूरग्रस्त प्राण्यांना पशुवैद्यकीय उपचार आणि आवश्यक मदत उपलब्ध करून दिली.

 

 

या पथकात एक पशुवैद्यकीय डॉक्टर, दोन पॅरावेट्स आणि पाच बचावकार्य कर्मचारी यांचा समावेश होता. प्रतिकूल हवामान, पाण्याने भरलेले रस्ते आणि आव्हानात्मक भौगोलिक परिस्थितीचा सामना करीत या पथकाने पूरग्रस्त गावांमध्ये पोहोचून प्राण्यांना मदत केली.

15 दिवसांच्या या मोहिमेदरम्यान पथकाने 3 हजारहून अधिक प्राण्यांवर आपत्कालीन वैद्यकीय उपचार केले. दीर्घकाळ दूषित पुराच्या पाण्यात राहिल्यामुळे अनेक प्राण्यांना निर्जलीकरण, संसर्ग, दुखापती, अशक्तपणा आणि इतर आरोग्यविषयक समस्यांना सामोरे जावे लागत होते. गंभीर स्थितीतील प्राण्यांना खत फ्लुइड्स तसेच विशेष वैद्यकीय देखरेख देण्यात आली. मदतकार्याचा एक भाग म्हणून फाउंडेशनने स्थानिक पशुपालक आणि प्राण्यांची देखभाल करणार्‍या व्यक्तींना 2 हजार 500 पशुवैद्यकीय मदत किट्स वितरित केल्या. या किट्समध्ये आवश्यक औषधे, अँटिसेप्टिक्स आणि पोषणविषयक सप्लिमेंट्सचा समावेश होता. त्यामुळे पथक परतल्यानंतरही प्राण्यांची प्राथमिक काळजी आणि उपचार सुरू ठेवणे शक्य होणार आहे.

आपत्ती काळात प्राण्यांपर्यंत मदत पोहचविणे महत्वाचे

पशुधनावर अवलंबून असलेल्या ग्रामीण कुटुंबांसाठी प्राण्यांचे आजारी पडणे किंवा त्यांचा मृत्यू होणे याचा आर्थिकदृष्ट्याही मोठा परिणाम होऊ शकतो. प्राणी त्यांचा त्रास शब्दांत व्यक्त करू शकत नाहीत. त्यामुळे आपत्तीच्या काळात त्यांच्यापर्यंत पोहोचणे अधिक महत्त्वाचे ठरते. उपचार मिळालेला प्रत्येक प्राणी आणि वितरित केलेले प्रत्येक वैद्यकीय किट महत्त्वपूर्ण बदल घडवून आणू शकते, असे प्यार फाउंडेशनच्या प्रतिनिधींनी सांगितले.