उज्जैनच्या महाकाल मंदिरात अफवेमुळे गोंधळ!

Rumors in Ujjain's Mahakal temple मध्य प्रदेशातील उज्जैन येथील प्रसिद्ध महाकाल मंदिर परिसरात सोमवारी अचानक भीतीचे वातावरण पसरल्याने चेंगराचेंगरीची परिस्थिती निर्माण झाली. या घटनेत काही भाविक जखमी झाले असून त्यांच्यावर चरक रुग्णालयात उपचार सुरू आहेत. महाकाल मंदिराच्या वरच्या मजल्यावर असलेल्या श्री नागचंद्रेश्वर मंदिराच्या दर्शनासाठी हरसिद्धी मंदिर चौकात भाविकांची रांग लागली होती. याचवेळी बॅरिकेड्सच्या आतील भागात असलेल्या वीज पुरवठ्याच्या डीपीजवळ जिवंत विद्युत प्रवाह असल्याची अफवा पसरली. ही माहिती गर्दीत वेगाने पसरल्यानंतर भाविकांमध्ये घबराट निर्माण झाली. सुरक्षित ठिकाणी जाण्याच्या प्रयत्नात गर्दीचा दबाव वाढला आणि चेंगराचेंगरी झाली.

 

 

 

 

या घटनेत अनेक भाविक जखमी झाले. जखमींना तातडीने उपचारासाठी चरक रुग्णालयात दाखल करण्यात आले. जखमींमध्ये उज्जैनच्या धांडा भवन येथील हिंदू बाई, किशनपुरा येथील मनीष यांचा १९ वर्षीय मुलगा सागर, धांडा भवन येथील लक्ष्मीबाई, गंजबासोडा येथील अनुसूया आणि तिची आई ममता यांचा समावेश आहे.याशिवाय गुजरातमधील वापी येथील सिल्वासा गावातील हरिश्चंद्र, ग्वाल्हेरमधील १८ वर्षीय सोनम, बिहारमधील दरभंगा येथील सुजित कुमार, ग्वाल्हेरमधील खुशी तसेच गुजरातमधील वलसाड येथील तुळसी आणि तिची आई रेखा बाई यांनाही दुखापत झाली आहे.

 

 

चेंगराचेंगरीदरम्यान बॅरिकेड्सला धडक बसल्याने हरिश्चंद्र यांच्या पायाला गंभीर दुखापत झाली. सर्व जखमींवर चरक रुग्णालयात वैद्यकीय उपचार सुरू आहेत. घटनेनंतर काही काळ मंदिरातील दर्शन व्यवस्थेवर परिणाम झाला होता. परिस्थिती नियंत्रणात आणण्यासाठी घटनास्थळी उपस्थित पोलीस आणि प्रशासकीय अधिकाऱ्यांनी तातडीने हस्तक्षेप केला. गर्दीचे व्यवस्थापन करून परिस्थिती पूर्वपदावर आणण्यात आली. सध्या महाकाल मंदिरातील दर्शन व्यवस्था सुरळीत सुरू असल्याची माहिती आहे.