नागपूरची दिव्या, बुद्धीची राणी, 'अर्जुन' पुरस्काराने गाजली कहाणी!

divya-deshmukh : नागपूरची युवा बुद्धिबळपटू दिव्या देशमुख हिच्या शिरपेचात आणखी एक मानाचा तुरा खोवला गेला आहे. २०२५ मधील उत्कृष्ट कामगिरीची दखल घेत तिची प्रतिष्ठेच्या अर्जुन पुरस्कारासाठी निवड करण्यात आली आहे. केंद्रीय क्रीडा मंत्रालयाने राष्ट्रीय क्रीडा पुरस्कारांची घोषणा केली असून, यामध्ये दिव्या देशमुखसह बुद्धिबळपटू विदित गुजराती, ॲथलेटिक्सपटू तेजस्विन शंकर आणि बॅडमिंटनपटू गायत्री गोपीचंद व ट्रेसा जॉली यांचा समावेश आहे.

 

 

 

 

 

नागपूरच्या दिव्या देशमुखने बुद्धिबळाच्या क्षेत्रात दमदार कामगिरी करत देशाचे नाव उंचावले आहे. जॉर्जियामध्ये झालेल्या फिडे महिला बुद्धिबळ विश्वचषक स्पर्धेत विजेतेपद मिळवत तिने ऐतिहासिक कामगिरी केली. या उल्लेखनीय यशासह २०२५ मधील तिच्या सातत्यपूर्ण कामगिरीची दखल घेत अर्जुन पुरस्कारासाठी तिची निवड करण्यात आली.

 

क्रीडा क्षेत्रात उल्लेखनीय कामगिरी करणाऱ्या खेळाडूंना अर्जुन पुरस्काराने गौरवले जाते. मागील चार वर्षांतील कामगिरीसोबतच खेळाडूचे नेतृत्वगुण, खिलाडूवृत्ती आणि शिस्त यांचाही पुरस्कारासाठी विचार केला जातो. त्यामुळे दिव्या देशमुखसाठी हा सन्मान तिच्या कारकिर्दीतील महत्त्वाचा टप्पा मानला जात आहे.

 

केंद्रीय क्रीडा मंत्रालयाने प्रसिद्ध केलेल्या माहितीनुसार, राष्ट्रीय क्रीडा पुरस्कारांसाठी सर्वोच्च न्यायालयाचे निवृत्त न्यायमूर्ती अरुण कुमार मिश्रा यांच्या अध्यक्षतेखाली निवड समिती स्थापन करण्यात आली होती. या समितीच्या शिफारशींच्या आधारे विविध क्रीडा प्रकारांतील खेळाडू, प्रशिक्षक आणि संस्थांना पुरस्कार देण्याचा निर्णय घेण्यात आला.

 

 

यंदाच्या राष्ट्रीय क्रीडा पुरस्कारांमध्ये मेजर ध्यानचंद खेलरत्न पुरस्कारासाठी मात्र एकाही खेळाडूची निवड करण्यात आलेली नाही. गेल्या १२ वर्षांतील ही पहिलीच वेळ असल्याचे सांगितले जात आहे. यापूर्वी २०१४ मध्येही कोणत्याही खेळाडूला खेलरत्न पुरस्कार देण्यात आला नव्हता.

 

 

फुटबॉल क्षेत्रातील ज्येष्ठ खेळाडू आय. अरुमैनायगम यांची अर्जुन पुरस्काराच्या जीवनगौरव श्रेणीसाठी निवड करण्यात आली आहे. १९६२ मध्ये जकार्ता येथे झालेल्या आशियाई क्रीडा स्पर्धेत सुवर्णपदक जिंकणाऱ्या भारतीय फुटबॉल संघाचे ते सदस्य होते. त्यांच्या दीर्घकालीन योगदानाची दखल घेत त्यांना हा विशेष सन्मान देण्यात येणार आहे.

 

 

यंदाच्या पुरस्कारांमध्ये तीन प्रशिक्षकांची द्रोणाचार्य पुरस्कारासाठी निवड करण्यात आली आहे. ॲथलेटिक्समधील परवीर सिंह, बॉक्सिंगमधील छोटे लाल यादव आणि शूटिंगमधील नेहा नंदकुमार चव्हाण यांचा त्यात समावेश आहे.

 

खेळाडूंना राष्ट्रीय आणि आंतरराष्ट्रीय स्तरावर सातत्याने चांगली कामगिरी करण्यासाठी मार्गदर्शन करणाऱ्या तसेच त्यांच्या यशात महत्त्वाची भूमिका बजावणाऱ्या प्रशिक्षकांना द्रोणाचार्य पुरस्काराने गौरवले जाते.

 

दिव्या देशमुखसह देशातील अनेक खेळाडू आणि प्रशिक्षकांच्या कामगिरीची दखल घेत जाहीर करण्यात आलेले हे राष्ट्रीय क्रीडा पुरस्कार क्रीडा क्षेत्रासाठी महत्त्वाचे मानले जात आहेत. नागपूरच्या दिव्याच्या यशामुळे विदर्भाच्या क्रीडा क्षेत्रातही आनंदाचे वातावरण निर्माण झाले आहे.