ढगांचा डेरा, पावसाचा फेरा! उत्तर भारतापासून महाराष्ट्रापर्यंत ‘मेघगर्जना’

heavy rain उत्तर प्रदेश, बिहार, झारखंड आणि ओडिशासह देशातील अनेक राज्यांमध्ये पावसाचा जोर मंगळवारीही कायम राहणार आहे. भारत मौसम विज्ञान विभागाने (IMD) देशातील अनेक भागांत आज मुसळधार ते अतिमुसळधार पावसाचा अंदाज व्यक्त केला आहे. झारखंड, बिहार, छत्तीसगड, पूर्व मध्य प्रदेश, हिमाचल प्रदेश, ओडिशा आणि उत्तर प्रदेश या राज्यांमध्ये विशेषतः जोरदार पावसाची शक्यता असून, अन्य काही राज्यांमध्ये वादळी वाऱ्यांसह विजांच्या कडकडाटाची शक्यता आहे.

 

 

उत्तर-पश्चिम बंगालच्या उपसागरात तसेच लगतच्या पश्चिम बंगाल आणि उत्तर ओडिशा किनारपट्टीवर निर्माण झालेल्या कमी दाबाच्या क्षेत्राचा परिणाम पुढील दोन दिवस जाणवणार आहे. या प्रभावामुळे गंगेच्या मैदानी भागातील पश्चिम बंगाल, ओडिशा, छत्तीसगड आणि झारखंडमध्ये मुसळधार ते अतिमुसळधार पावसाची शक्यता हवामान विभागाने व्यक्त केली आहे. पंजाबमध्येही आज पावसाची शक्यता आहे.

दिल्ली-एनसीआरमध्ये १८ ऑगस्ट रोजी आकाश ढगाळ राहण्याची शक्यता असून, काही भागांत हलका पाऊस पडू शकतो. दिल्लीसोबतच नोएडा, गाझियाबाद, फरिदाबाद आणि गुरुग्राममध्येही हलक्या पावसाची शक्यता आहे.

उत्तर प्रदेशातील अनेक भागांना आज मुसळधार पावसाचा इशारा देण्यात आला आहे. अयोध्या, आग्रा, अलीगड, औरैया, आझमगड, बदायूं, बागपत, बहराइच, बलिया, बांदा, बाराबंकी, बरेली, बस्ती, भदोही, बिजनौर, बुलंदशहर, चंदौली, देवरिया, एटा, इटावा, फर्रुखाबाद, फिरोजाबाद, गाझियाबाद, गाझीपूर, गोंडा, गोरखपूर, हमीरपूर, हापूड, हरदोई, हाथरस, जालौन, झाशी, कानपूर, ललितपूर आणि महोबा या जिल्ह्यांचा त्यात समावेश आहे. लखनौमध्ये मंगळवारी पावसाची शक्यता असून, दिवसभरातील तापमान २८ ते २९ अंश सेल्सिअसच्या आसपास, तर रात्रीचे तापमान सुमारे २५ अंश सेल्सिअस राहण्याचा अंदाज आहे. वाऱ्याचा वेग ताशी सुमारे २० किलोमीटर राहू शकतो.बिहारमध्येही आज अनेक जिल्ह्यांसाठी पावसाचा इशारा कायम आहे. आरा, अररिया, औरंगाबाद, भागलपूर, बोधगया, बक्सर, छपरा, दरभंगा, पूर्व चंपारण, गया, हाजीपूर, कटिहार, मोतिहारी, मुजफ्फरपूर, नालंदा आणि पाटणा येथे वादळी वाऱ्यांसह मुसळधार पाऊस पडण्याची शक्यता आहे.झारखंडमध्ये धनबाद, पूर्व सिंहभूम, गढवा, गुमला, हजारीबाग, खूंटी, लोहरदगा, पलामू, रांची, सरायकेला-खरसावन, सिमडेगा आणि पश्चिम सिंहभूम येथे मंगळवारी जोरदार वाऱ्यांसह पावसाची शक्यता आहे.पूर्व मध्य प्रदेशातही आज मुसळधार पावसाचा अंदाज आहे. अनूपपूर, बालाघाट, छतरपूर, दमोह, डिंडोरी, नरसिंहपूर, सागर, सिवनी, शहडोल, सीधी आणि उमरिया या जिल्ह्यांसाठी हवामान विभागाने जोरदार पावसाचा इशारा दिला आहे. काही भागांत पूरसदृश परिस्थिती निर्माण होण्याची शक्यताही व्यक्त करण्यात आली आहे.

हिमाचल प्रदेशातील हमीरपूर, मंडी, बिलासपूर, कांगडा, सिरमौर, शिमला आणि सोलन येथे पाऊस आणि वादळाची शक्यता आहे. या भागांत दिवसाचे तापमान सुमारे १६ अंश सेल्सिअस, तर रात्रीचे तापमान १० ते ११ अंश सेल्सिअसच्या आसपास राहण्याचा अंदाज आहे.

महाराष्ट्रातील बहुतांश भागांमध्ये सध्या ढगाळ वातावरण असून, काही ठिकाणी हलक्या ते मध्यम स्वरूपाचा पाऊस होण्याची शक्यता आहे. ताज्या अंदाजानुसार, राज्यात पुढील पाच दिवस हलका पाऊस पडण्याची शक्यता कायम आहे.

दरम्यान, १८ ते २२ ऑगस्टदरम्यान जम्मू-काश्मीर, लडाख, गिलगिट-बाल्टिस्तान आणि मुझफ्फराबाद येथेही पावसाची शक्यता आहे. अंदमान-निकोबार बेटे, सिक्कीम, आसाम, मेघालय, नागालँड, मणिपूर, मिझोराम आणि त्रिपुरा या ईशान्येकडील राज्यांमध्येही पाऊस होण्याचा अंदाज हवामान विभागाने व्यक्त केला आहे.