इंग्लंड-पाकिस्तान कसोटीला आजपासून सुरुवात!

england pakistan test match इंग्लंड आणि पाकिस्तान यांच्यातील तीन सामन्यांच्या कसोटी मालिकेला आजपासून सुरुवात होत आहे. मालिकेतील पहिला सामना लीड्समधील हेडिंग्ले मैदानावर रंगणार असून, जागतिक कसोटी चॅम्पियनशिपच्या २०२५-२७ चक्राच्या दृष्टीने ही मालिका दोन्ही संघांसाठी अत्यंत महत्त्वाची आहे. भारतातील क्रिकेटप्रेमींनाही या मालिकेतील सामने थेट पाहता येणार आहेत.

पाकिस्तानने इंग्लंडचा अखेरचा दौरा २०२० मध्ये केला होता. त्यानंतर इंग्लंडने दोन वेळा पाकिस्तानचा दौरा केला. पाकिस्तानने २०२४/२५ मध्ये मायदेशात कसोटी मालिका जिंकली होती. मात्र, त्यानंतर संघाला एका मालिकेत पराभव स्वीकारावा लागला असून दोन मालिका अनिर्णित राहिल्या आहेत.

इंग्लंडच्या भूमीवर पाकिस्तानने अखेरची कसोटी मालिका १९९६ मध्ये जिंकली होती. त्यानंतर २०१६ आणि २०१८ मधील मालिका अनिर्णित राहिल्या, तर २०२० मध्ये इंग्लंडने तीन सामन्यांची मालिका १-० अशी जिंकली. त्यामुळे यंदाच्या मालिकेत पाकिस्तानसमोर इंग्लंडमध्ये दीर्घकाळापासून असलेला हा दुष्काळ संपवण्याचे आव्हान असेल.

पाकिस्तानसाठी पहिल्या कसोटीपूर्वी मोठी अडचण निर्माण झाली आहे. हाताच्या दुखापतीमुळे बाबर आझम पहिल्या सामन्यात खेळणार नाही. बाबरला कसोटी कर्णधारपद पुन्हा देण्यात आले आहे, मात्र त्याच्या अनुपस्थितीत सलमान अली आगा संघाचे नेतृत्व करणार आहे. दुसरीकडे इंग्लंडच्या कसोटी संघातही बदलाचे पर्व सुरू झाले आहे. बेन स्टोक्सच्या कसोटी क्रिकेटमधून निवृत्तीनंतर जो रूट पुन्हा संघाचे नेतृत्व करत आहे. या मालिकेसाठी मार्कस ट्रेस्कोथिक हंगामी मुख्य प्रशिक्षकाची जबाबदारी सांभाळणार आहेत.

इंग्लंड आणि पाकिस्तानसाठी या मालिकेचे महत्त्व केवळ द्विपक्षीय क्रिकेटपुरते मर्यादित नाही. दोन्ही संघ जागतिक कसोटी चॅम्पियनशिपच्या २०२५-२७ चक्रात खेळत आहेत. सध्या इंग्लंड गुणतालिकेत सातव्या स्थानावर असून पाकिस्तान आठव्या क्रमांकावर आहे. त्यामुळे मालिकेतील प्रत्येक सामन्याचा निकाल त्यांच्या WTC मोहिमेवर परिणाम करू शकतो.

पहिला सामना १९ ऑगस्टपासून लीड्समधील हेडिंग्ले येथे खेळवला जाणार आहे. इंग्लंडच्या स्थानिक वेळेनुसार सामना सकाळी ११ वाजता सुरू होईल. भारतात त्याचे थेट प्रक्षेपण दुपारी ३ वाजून ३० मिनिटांनी सुरू होईल. मालिकेतील दुसरी कसोटी २७ ते ३१ ऑगस्टदरम्यान लंडनमधील लॉर्ड्सवर, तर तिसरी कसोटी ९ ते १३ सप्टेंबरदरम्यान बर्मिंगहॅममधील एजबास्टन येथे होणार आहे. तिन्ही सामने इंग्लंडमध्ये सकाळी ११ वाजता, तर भारतात दुपारी ३:३० वाजता सुरू होतील.

भारतात या संपूर्ण कसोटी मालिकेचे थेट प्रक्षेपण सोनी स्पोर्ट्स नेटवर्कवर करण्यात येणार आहे. टीव्हीवर चाहते सोनी टेन ५ आणि सोनी टेन ५ एचडी या वाहिन्यांवर सामने पाहू शकतील. डिजिटल माध्यमातून सामने पाहण्यासाठी सोनी लिव्ह ॲप आणि वेबसाइटचा पर्याय उपलब्ध असेल.

इंग्लंड आणि पाकिस्तान यांच्यातील पहिली कसोटी १९ ते २३ ऑगस्टदरम्यान हेडिंग्ले, लीड्स येथे होईल. दुसरी कसोटी २७ ते ३१ ऑगस्टदरम्यान लॉर्ड्स, लंडन येथे रंगणार आहे. मालिकेतील अखेरची आणि तिसरी कसोटी ९ ते १३ सप्टेंबरदरम्यान एजबास्टन, बर्मिंगहॅम येथे खेळवली जाईल.

इंग्लंडच्या संघात जो रूट (कर्णधार), जोफ्रा आर्चर, गस ऍटकिन्सन, शोएब बशीर, हॅरी ब्रूक, ब्रायडन कार्स, सॅम कुक, जॉर्डन कॉक्स, बेन डकेट, मॅथ्यू फिशर, एमिलियो गे, डॅन लॉरेन्स, ऑली पोप, ऑली रॉबिन्सन, जेमी स्मिथ आणि जोश टंग यांचा समावेश आहे.

पाकिस्तानच्या संघात बाबर आझम (कर्णधार), आमिर जमाल, अब्दुल्ला फजल, अली उस्मान, अझान अवेस, इमाम-उल-हक, खुर्रम शहजाद, मोहम्मद अब्बास, मोहम्मद अली, मोहम्मद रिझवान, मोहम्मद अवैस जफर, मोहम्मद गाझी घोरी, साजिद खान, सलमान अली आगा, सौद शकील, शान मसूद आणि उबा शाह यांचा समावेश आहे.