काखेच्या काळेपणावर घरगुती उपाय धोकादायक?

dark underarms dangerous काखेचा काळेपणा ही अनेक महिलांसाठी सौंदर्य आणि आत्मविश्वासाशी संबंधित समस्या ठरते. त्यामुळे हा काळेपणा कमी करण्यासाठी अनेकजण बेकिंग सोडा, लिंबू किंवा इतर घरगुती उपायांचा आधार घेतात. मात्र, हे उपाय त्वचेसाठी फायदेशीर नसून उलट नुकसानकारक ठरू शकतात, असा इशारा डर्माफोलिक्स हेअर ट्रान्सप्लांट अँड स्किन क्लिनिकच्या संस्थापक तसेच त्वचारोगतज्ज्ञ आणि सौंदर्य चिकित्सक डॉ. आंचल पंथ (एमबीबीएस, एमडी) यांनी दिला आहे.

 

 

डॉ. पंथ यांच्या मते, काखेचा काळेपणा हा केवळ स्वच्छतेच्या अभावामुळे होत नाही. त्वचेवर सतत होणारे घर्षण, अनुवांशिक कारणे, हार्मोन्समधील बदल, काही वैद्यकीय समस्या, वारंवार शेव्हिंग, डिओडोरंटमुळे होणारी जळजळ तसेच घट्ट कपडे परिधान करणे हीदेखील या समस्येमागील प्रमुख कारणे असू शकतात.

 

काखेचा रंग उजळण्यासाठी अनेकजण बेकिंग सोडा किंवा लिंबासारखे उपाय वापरतात. मात्र, अशा पदार्थांमुळे त्वचेच्या नैसर्गिक संरक्षणात्मक थराला इजा होण्याची शक्यता असते. परिणामी त्वचेवर जळजळ, संवेदनशीलता आणि काळेपणा आणखी वाढू शकतो. त्यामुळे कोणताही घरगुती उपाय वापरण्यापूर्वी तज्ज्ञांचा सल्ला घेणे आवश्यक असल्याचे त्यांनी स्पष्ट केले.

 

काखेची त्वचा निरोगी ठेवण्यासाठी नियमितपणे मॉइश्चरायझर वापरणे महत्त्वाचे आहे. विशेषतः शेव्हिंगनंतर सुगंधरहित मॉइश्चरायझर लावल्यास त्वचेचा संरक्षणात्मक थर टिकून राहण्यास मदत होते. याशिवाय आठवड्यातून एक ते दोन वेळा सौम्य पद्धतीने एक्सफोलिएशन केल्यास मृत त्वचा, डिओडोरंटचे अवशेष आणि जीवाणू दूर होण्यास मदत होते. त्यामुळे काळे डाग आणि दुर्गंधी कमी होण्यासही फायदा होऊ शकतो.

 

डॉ. आंचल पंथ यांच्या मते, नियासिनमाइडयुक्त क्रीम्स काही प्रकरणांमध्ये काखेचा काळेपणा कमी करण्यास मदत करू शकतात. मात्र, त्वचा उजळविणारी कोणतीही क्रीम डॉक्टरांच्या सल्ल्याशिवाय वापरू नये. योग्य निदान आणि तज्ज्ञांच्या मार्गदर्शनाखाली उपचार केल्यासच सुरक्षित आणि प्रभावी परिणाम मिळू शकतात.