दुसऱ्या कसोटीत कुलदीपच्या जागी नव्या खेळाडूला संधी

Kuldeep out of the second Test भारत आणि श्रीलंका यांच्यातील दोन सामन्यांच्या कसोटी मालिकेतील दुसरा सामना रविवार, 23 ऑगस्टपासून सिंहली स्पोर्ट्स क्लब क्रिकेट ग्राउंडवर सुरू होणार आहे. पहिल्या कसोटीत विजय मिळवत भारताने मालिकेत 1-0 अशी आघाडी घेतली आहे. WTC 2025-27 चक्रातील आपला पीसीटी आणखी सुधारण्यासाठी आणि अंतिम फेरीतील स्थानाची दावेदारी मजबूत करण्यासाठी भारताला दुसऱ्या कसोटीतही विजय मिळवणे महत्त्वाचे ठरणार आहे.पहिल्या कसोटीत भारतीय फलंदाज आणि गोलंदाजांनी प्रभावी कामगिरी केली. देवदत्त पडिक्कलने पहिल्या डावात 167 धावांची शानदार खेळी केली, तर केएल राहुलने दोन्ही डावांत चांगली फलंदाजी केली. ऋषभ पंतने दुसऱ्या डावात संघाला गरज असताना वेगाने धावा केल्या.

 

 

 

 

गोलंदाजीत मोहम्मद सिराज आणि प्रसिद्ध कृष्णाने चांगली कामगिरी केली. फिरकीपटू मानव सुथार आणि रवींद्र जडेजाने श्रीलंकेच्या फलंदाजांवर दबाव निर्माण केला. मानव सुथारने दोन्ही डावांत मिळून 10 विकेट घेतल्या. मात्र कुलदीप यादवला अपेक्षित प्रभाव पाडता आला नाही. पहिल्या डावात त्याने 14 षटकांत 65 धावा देत एक विकेट घेतली, तर दुसऱ्या डावात 11 षटके टाकूनही त्याला एकही विकेट मिळाली नाही.दुसऱ्या कसोटीत कुलदीप यादवच्या जागी सारांश जैनला संधी मिळण्याची शक्यता आहे. श्रीलंकेच्या संघात अनेक डावखुरे फलंदाज असल्याने ऑफस्पिन गोलंदाज भारतासाठी उपयुक्त ठरू शकतो. त्यामुळे संघ व्यवस्थापन सारांश जैनचा प्लेइंग-11 मध्ये समावेश करण्याचा विचार करू शकते. गोलंदाजीसोबत सारांश जैन फलंदाजीतही योगदान देण्याची क्षमता ठेवतो.

 

सारांश जैनला दुसऱ्या कसोटीत खेळवण्यात आले, तर हा त्याचा आंतरराष्ट्रीय क्रिकेटमधील पदार्पणाचा सामना ठरेल. त्याने 54 प्रथम श्रेणी सामन्यांमध्ये 85 डावांत 2223 धावा केल्या आहेत. गोलंदाज म्हणून त्याने 97 डावांत 188 विकेट घेतल्या असून, प्रथम श्रेणी क्रिकेटमध्ये 10 सामन्यांत त्याने पाच किंवा त्यापेक्षा अधिक विकेट घेण्याची कामगिरी केली आहे.दुसऱ्या कसोटीसाठी भारताच्या संभाव्य संघात यशस्वी जायसवाल, केएल राहुल, देवदत्त पडिक्कल, कर्णधार शुभमन गिल, यष्टिरक्षक ऋषभ पंत, ध्रुव जुरेल, रवींद्र जडेजा, मानव सुथार, सारांश जैन, मोहम्मद सिराज आणि प्रसिद्ध कृष्णा यांचा समावेश होऊ शकतो. भारताच्या संघातील इतर खेळाडूंमध्ये शुभमन गिल, केएल राहुल, सरफराज खान, ऋषभ पंत, देवदत्त पडिक्कल, यशस्वी जायसवाल, ध्रुव जुरेल, रवींद्र जडेजा, सारांश जैन, मानव सुथार, कुलदीप यादव, प्रसिद्ध कृष्णा, मोहम्मद सिराज, आकिब नबी आणि गुरनूर बरार यांचा समावेश आहे.