३ वर्षांनंतर रेनशॉचे कसोटी संघात पुनरागमन

renshaw returns to test team ऑस्ट्रेलिया आणि बांगलादेश यांच्यातील कसोटी मालिकेतील दुसरा सामना २२ ऑगस्ट रोजी मॅके येथे खेळवला जाणार आहे. पहिल्या कसोटीत बांगलादेशने ऑस्ट्रेलियाचा पराभव करत ऐतिहासिक विजय मिळवल्यानंतर आता दुसऱ्या सामन्यासाठी ऑस्ट्रेलियाच्या संघरचनेकडे सर्वांचे लक्ष लागले आहे. या सामन्याच्या प्लेइंग इलेव्हनमध्ये ऑस्ट्रेलियाकडून काही महत्त्वाचे बदल केले जाण्याची शक्यता आहे. ऑस्ट्रेलियाचा कर्णधार पॅट कमिन्सने दुसऱ्या कसोटीसाठी सलामीच्या जोडीतील बदल निश्चित असल्याचे स्पष्ट केले आहे. मॅट रेनशॉ हा ट्रॅव्हिस हेडसोबत डावाची सुरुवात करणार आहे. त्यामुळे जॅक वेदरॉल्डला संघातून बाहेर बसावे लागणार आहे. पहिल्या कसोटीत वेदरॉल्डने सलामीची जबाबदारी सांभाळली होती. रेनशॉ जवळपास तीन वर्षांनंतर ऑस्ट्रेलियाच्या कसोटी संघात पुनरागमन करत आहे.

मॅकेच्या परिस्थितीचा विचार करता ऑस्ट्रेलिया चार वेगवान गोलंदाजांसह मैदानात उतरण्याची शक्यता आहे. असा निर्णय घेतल्यास अनुभवी फिरकीपटू नॅथन लायनला प्लेइंग इलेव्हनमधून वगळले जाऊ शकते. त्याच्या जागी स्कॉट बोलँडला संधी मिळण्याची शक्यता आहे.मात्र, अंतिम संघाबाबत निर्णय घेण्यासाठी ऑस्ट्रेलियन संघ आणखी एक दिवस परिस्थितीचा अंदाज घेणार आहे. कर्णधार पॅट कमिन्सने सांगितले आहे की, संघ पहिल्यांदाच या मैदानावर खेळणार असल्याने खेळपट्टी आणि हवामानाची स्थिती समजून घेणे महत्त्वाचे आहे. चार वेगवान गोलंदाज प्रभावी ठरतील की एका फिरकीपटूला संघात ठेवणे अधिक फायदेशीर ठरेल, याचा निर्णय परिस्थिती पाहून घेतला जाणार आहे.

डार्विनमध्ये झालेल्या पहिल्या कसोटीत नॅथन लायनची कामगिरी विशेष प्रभावी ठरली नाही. पहिल्या डावात त्याने १०२ धावा देत केवळ एक विकेट घेतली. गेल्या डिसेंबरमध्ये ॲशेस मालिकेदरम्यान झालेल्या हॅमस्ट्रिंगच्या दुखापतीतून पूर्णपणे सावरल्यानंतरचा हा त्याचा पहिलाच सामना होता. बांगलादेशच्या फलंदाजांनी त्याचा चांगला सामना करत त्याला मोठे यश मिळू दिले नाही.२०१२ मध्ये वाका येथे भारताविरुद्धच्या कसोटीनंतर पूर्णपणे तंदुरुस्त असतानाही लायनला ऑस्ट्रेलियाच्या अंतिम ११ खेळाडूंमधून वगळण्याची ही पहिलीच वेळ ठरू शकते.संघनिवडीबाबत पॅट कमिन्सने खेळपट्टी आणि हवामानाच्या परिस्थितीला महत्त्व असल्याचे स्पष्ट केले आहे. पहिल्या दोन डावांमध्ये वेगवान गोलंदाज विरोधी संघाचे सर्व १० फलंदाज लवकर बाद करू शकतील, तसेच सामन्याच्या चौथ्या आणि अंतिम डावात खेळपट्टी खराब होऊन फिरकी गोलंदाजांना फायदा मिळण्याची शक्यता कमी असेल, तर चार वेगवान गोलंदाजांसह खेळण्याचा पर्याय योग्य ठरू शकतो. त्यामुळे या सर्व बाबींचा विचार करून अंतिम संघ निश्चित केला जाणार आहे.