वंदे मातरम्’च्या सन्मानावर तडजोड नाही!

BJP opposes Congress' decision काँग्रेसच्या कार्यक्रमांमध्ये ‘वंदे मातरम्’चे गायन केवळ पहिल्या दोन कडव्यांपुरते मर्यादित ठेवण्याच्या काँग्रेस कार्यकारिणी समितीच्या निर्णयावरून भाजपने तीव्र आक्षेप घेतला आहे. शनिवारी २२ ऑगस्ट रोजी भाजपने या निर्णयाचा निषेध करणारा ठराव मंजूर केला. काँग्रेस कार्यकारिणी समितीने १९ ऑगस्ट २०२६ रोजी घेतलेल्या निर्णयात १९३७ मधील ठरावाचा पुनरुच्चार करण्यात आल्याचे भाजपने म्हटले आहे.भाजपचे अध्यक्ष नितीन नवीन यांनी या निर्णयावर पक्षाची भूमिका स्पष्ट करताना सांगितले की, ‘वंदे मातरम्’च्या संपूर्ण सहा कडव्यांना राष्ट्रीय चेतना आणि स्वातंत्र्यलढ्याच्या वारशाशी जोडले जाते. त्यामुळे त्याची प्रतिष्ठा, सन्मान आणि ऐतिहासिक वारसा अबाधित ठेवण्यासाठी पक्ष प्रयत्नशील राहणार असल्याचे त्यांनी नमूद केले.

 

 

 

नितीन नवीन यांच्या मते, भाजप ‘वंदे मातरम्’कडे भारतमातेप्रती आदर व्यक्त करणारे गीत, स्वातंत्र्यलढ्याची प्रेरणा आणि राष्ट्रीय भावनेचे प्रतीक म्हणून पाहतो. जातीय दबाव, राजकीय लांगुलचालन किंवा व्होट-बँक राजकारणाच्या प्रभावाखाली त्याच्या सन्मानाशी कोणतीही तडजोड केली जाऊ नये, अशी पक्षाची भूमिका आहे.१९५० मध्ये संविधान सभेने घेतलेल्या निर्णयाचा तसेच २०२६ मध्ये संसदेने ‘जन गण मन’च्या बरोबरीने ‘वंदे मातरम्’ला दिलेल्या वैधानिक संरक्षणाचा दाखला देत भाजपने आपली भूमिका मांडली आहे. काँग्रेस कार्यकारिणी समितीचा कोणताही ठराव हा घटनात्मक संस्था किंवा संसदेने केलेल्या कायद्यापेक्षा वरचढ ठरू शकत नाही, असेही नितीन नवीन यांनी म्हटले आहे.

 

 

‘वंदे मातरम्’च्या गायनावर १९३७ मध्ये निर्बंध घालण्यामागील ऐतिहासिक परिस्थितीवरही भाजप देशभरात चर्चा घडवून आणणार असल्याचे त्यांनी सांगितले. या संदर्भात मुस्लिम लीगचा आक्षेप आणि त्यानंतर निर्माण झालेल्या जातीयवादी तसेच फुटीरतावादी मागण्यांच्या राजकारणाचा उल्लेख केला जाईल, असे भाजपचे म्हणणे आहे.महात्मा गांधी यांनी ‘वंदे मातरम्’ला दिलेल्या ऐतिहासिक महत्त्वाचाही भाजपकडून देशभर प्रचार केला जाणार आहे. गांधीजींनी या गीताला ‘साम्राज्यवादी विरोधी घोषणा’ आणि ‘शुद्धतम राष्ट्रीय भावना’शी जोडले असल्याचे नितीन नवीन यांनी सांगितले. या मुद्द्यावर भाजप आपल्या कार्यकर्त्यांच्या माध्यमातून देशव्यापी जनजागृती मोहीम राबवणार आहे. विशेषतः तरुणांमध्ये ‘वंदे मातरम्’चा इतिहास, त्याचा अर्थ, राष्ट्रीय महत्त्व आणि स्वातंत्र्यलढ्यातील योगदान पोहोचवण्याचा पक्षाचा प्रयत्न राहणार आहे. संपूर्ण सहा कडव्यांचे हे गीत आणि त्याच्याशी जोडलेला संघर्ष, त्याग व राष्ट्रीय जागृतीचा इतिहास पुढील पिढ्यांपर्यंत पोहोचवण्याचा निर्धारही भाजपने व्यक्त केला आहे. नितीन नवीन यांनी हा मुद्दा कोणत्याही एका राजकीय पक्षापुरता मर्यादित नसून देशाच्या सन्मानाशी आणि स्वातंत्र्यलढ्यात योगदान देणाऱ्या देशभक्तांच्या वारशाशी संबंधित असल्याचे म्हटले. त्यांच्या मते, १९४७ मध्ये भारताच्या स्वातंत्र्याची घोषणा ‘वंदे मातरम्’ने केली होती आणि पंतप्रधान नरेंद्र मोदी यांच्या नेतृत्वाखाली २०४७ मध्ये ‘विकसित भारताची’ घोषणा देखील ‘वंदे मातरम्’ असेल.