कसोटी क्रमवारीत बांगलादेशचा ‘पॉवर गेम’!

bangladesh आयसीसीच्या ताज्या कसोटी संघ क्रमवारीत मोठी उलथापालथ झाली आहे. ऑस्ट्रेलियाकडून दुसऱ्या कसोटीत पराभव पत्करूनही बांगलादेशने क्रमवारीत तब्बल तीन स्थानांची झेप घेत सहावे स्थान मिळवले आहे. दुसरीकडे, बांगलादेशच्या प्रगतीचा थेट फटका पाकिस्तानला बसला असून पाकिस्तान आठव्या स्थानावर घसरला आहे.

 

 

मॅके येथे ऑस्ट्रेलिया आणि बांगलादेश यांच्यातील दोन सामन्यांच्या कसोटी मालिकेतील दुसरा सामना अवघ्या दोन दिवसांत संपला. ऑस्ट्रेलियाने बांगलादेशवर एक डाव आणि ५१ धावांनी विजय मिळवत मालिका १-१ अशी बरोबरीत सोडवली. मालिकेत बांगलादेशने मिळवलेल्या यशानंतर आयसीसीने कसोटी क्रमवारी अद्ययावत केली आणि त्यात बांगलादेशला मोठा फायदा झाला. बांगलादेशने प्रथमच नवव्या स्थानाच्या पुढे जात सहावे स्थान पटकावले आहे. या सुधारणेवर बांगलादेशचा कर्णधार नाझमुल होसेन शांतोनेही समाधान व्यक्त केले. सहाव्या क्रमांकावर पोहोचणे ही संघासाठी मोठी उपलब्धी असल्याचे त्याने सांगितले. तसेच दुसऱ्या कसोटीत संघाने आणखी चांगला खेळ केला असता तर हा आनंद अधिक वाढला असता, असेही त्याने नमूद केले.

 

आयसीसी कसोटी संघ क्रमवारीत ऑस्ट्रेलिया अव्वल स्थानी कायम आहे. दक्षिण आफ्रिका दुसऱ्या, न्यूझीलंड तिसऱ्या, तर भारत चौथ्या क्रमांकावर आहे. बांगलादेशच्या सहाव्या स्थानामुळे श्रीलंकेला एका स्थानाचा फटका बसला असून ७६ रेटिंगसह श्रीलंका सातव्या क्रमांकावर आहे. दरम्यान, पाकिस्तान ७५ रेटिंगसह आठव्या स्थानावर घसरला आहे. वेस्ट इंडिज ७४ रेटिंगसह नवव्या क्रमांकावर आहे. इंग्लंडविरुद्ध सुरू असलेल्या कसोटी मालिकेत पाकिस्तानचा संपूर्ण पराभव झाल्यास त्याच्या क्रमवारीत आणखी घसरण होण्याची शक्यता आहे.