जपानला ५.९ तीव्रतेचा भूकंप; टोकियोपर्यंत हादरे

japan earthquake जपानमध्ये रविवारी ५.९ तीव्रतेचा भूकंप झाला. या भूकंपाचे जोरदार हादरे राजधानी टोकियोसह इबाराकी, चिबा आणि सैतामा प्रांतात जाणवले. भूकंपाचा केंद्रबिंदू दक्षिण इबाराकी प्रांतात जमिनीखाली सुमारे ७० किलोमीटर खोलीवर होता. या भूकंपामुळे सुनामीचा कोणताही धोका नसल्याचे प्रशासनाने स्पष्ट केले आहे. भूकंपात इबाराकीमध्ये २० जण जखमी झाल्याची माहिती समोर आली असून, अन्य जखमींचीही चौकशी सुरू आहे.

 

 

जपान हवामानशास्त्र संस्थेच्या माहितीनुसार, दक्षिण इबाराकी प्रांतात ७० किलोमीटर खोलीवर भूकंप झाला. जपानमधील हा भाग भूकंपाच्या दृष्टीने संवेदनशील असून, येथे वारंवार भूकंपाचे धक्के जाणवतात. अमेरिकेच्या युनायटेड स्टेट्स जिओलॉजिकल सर्व्हेने या भूकंपाची सुरुवातीची तीव्रता ५.८ नोंदवली होती.

फायर अँड डिझास्टर मॅनेजमेंट एजन्सीने दिलेल्या माहितीनुसार, टोकियोच्या ईशान्येकडील इबाराकी, चिबा आणि सैतामा प्रांतात किमान पाच जण जखमी झाले आहेत. मात्र, आणखी काही जण जखमी झाल्याची माहिती असून त्याबाबतचा तपशील तपासला जात आहे. सुरुवातीच्या माहितीनुसार इबाराकीमध्ये २० जण जखमी झाल्याचे सांगण्यात आले आहे.

भूकंपाचा परिणाम रेल्वे सेवांवरही झाला. टोकियो आणि नारिता विमानतळादरम्यान धावणाऱ्या एक्स्प्रेस रेल्वे तसेच ईशान्येकडील भागातील काही लोकल गाड्यांना विलंब झाला. मात्र, शिंकानसेन बुलेट ट्रेनची सेवा नेहमीप्रमाणे सुरू होती. ईस्ट जपान रेल्वे कंपनीने ही माहिती दिली.

भूकंपानंतर नागरिकांच्या मोबाइल फोनवर आपत्कालीन इशारे वाजू लागले. टोकियो शहरालाही भूकंपाचे जोरदार हादरे जाणवले. एनएचके या सार्वजनिक प्रसारमाध्यमाच्या वृत्तानुसार, मिटो आणि सैतामासह आसपासच्या शहरांमधील रस्त्यांवर वाहतूक मात्र सामान्य असल्याचे दिसून आले.

भूकंपानंतर पंतप्रधान सनाए तकाइची यांनी संभाव्य नुकसानीचा आढावा घेण्यासाठी टास्क फोर्स स्थापन केला. त्यांनी सोशल मीडिया प्लॅटफॉर्म ‘एक्स’वर याबाबत माहिती दिली.

दरम्यान, टोकियोच्या पूर्वेकडील कोटो भागात भूकंपामुळे जमिनीखालील पाण्याची पाइपलाइन फुटली. एनएचकेच्या दृश्यांमध्ये रस्त्यावर पाणी वाहत असल्याचे दिसून आले. टीईपीसीओ पॉवर ग्रिडच्या माहितीनुसार, भूकंपामुळे टोकियोतील सुमारे ४६० घरांचा वीजपुरवठा खंडित झाला होता. मात्र, रविवारी सकाळपर्यंत वीजपुरवठा पूर्ववत करण्यात आला.न्यूक्लियर रेग्युलेशन अथॉरिटीने दिलासा देणारी माहिती देताना सांगितले की, देशातील सुमारे डझनभर अणुऊर्जा प्रकल्प तसेच अणुइंधन किंवा अणुसामग्री हाताळणाऱ्या इतर सुविधांमध्ये कोणत्याही प्रकारची अनियमितता आढळलेली नाही.जपानला गेल्या महिन्यातही मोठ्या भूकंपाचा धक्का बसला होता. देशाच्या सर्वांत दक्षिणेकडील क्यूशू बेटावरील कुमामोटो भागात ७.१ तीव्रतेचा भूकंप झाला होता. या दुर्घटनेत ३८ जणांचा मृत्यू, तर ३६४ जण जखमी झाले होते. या भूकंपामुळे १,५०० हून अधिक इमारती उद्ध्वस्त झाल्या होत्या, तर सुमारे २० हजार इमारतींचे नुकसान झाले होते. (इनपुट : एपी)