‘घबाडकुंड’चा थरार OTTवर
‘तुंबाड’ची आठवण करून देणारे मराठी भयविश्व
Total Views |
मुंबई
ghabadkund मराठी चित्रपटसृष्टीत हॉरर आणि लोककथांवर आधारित चित्रपटांची संख्या तुलनेने कमी असली, तरी अशा कथांना प्रेक्षकांकडून नेहमीच वेगळा प्रतिसाद मिळतो. महाराष्ट्रातील लोककथा, रहस्य, खजिना आणि भय यांचा अनोखा संगम असलेला ‘घबाडकुंड’ सध्या ओटीटीवर चर्चेत आला आहे. प्राइम व्हिडीओवर उपलब्ध असलेला हा चित्रपट थिएटरमध्ये दमदार कमाई केल्यानंतर आता ओटीटीवरही ट्रेंड होत आहे. लोककथा आणि भय यांचा मिलाफ असलेला ‘तुंबाड’ आवडलेल्या प्रेक्षकांसाठी ‘घबाडकुंड’ हा वेगळा मराठी हॉरर अनुभव ठरू शकतो.
‘घबाडकुंड’ची कथा एका रहस्यमय विहिरीभोवती फिरते. या विहिरीशी लपवलेल्या सोन्याची आणि एका भयावह शक्तीची आख्यायिका जोडलेली आहे. गावातील लोकांना या विहिरीत खजिना असल्याची माहिती असते. मात्र, तो मिळवण्याचा प्रयत्न करणाऱ्यांसाठी ही जागा जीवघेणी ठरते. खजिन्याचे रक्षण करणाऱ्या अदृश्य शक्तीमुळे विहिरीचे गूढ अधिकच गडद होत जाते.
चित्रपटातील दिलीप हा सामान्य परिस्थितीत जगणारा तरुण आहे. एका प्रसंगात तो योगायोगाने या रहस्यमय विहिरीपर्यंत पोहोचतो. तिथे त्याला एका स्त्रीचा आवाज ऐकू येतो आणि त्याच्यावर संकट ओढावते. मात्र, आश्चर्याची बाब म्हणजे तो त्या विहिरीतून जिवंत बाहेर पडतो. या घटनेनंतर दिलीपच्या जन्माचे आणि त्या विहिरीच्या इतिहासाचे नाते हळूहळू उलगडण्यास सुरुवात होते.
दिलीप हा या गूढ खजिन्याचा वंशज असल्याचे समोर आल्यानंतर कथेला वेग येतो. दुसरीकडे खंगरी नावाचा तांत्रिकही या खजिन्यावर डोळा ठेवून असतो. पौर्णिमेच्या दिवशी विहिरीतील खजिना बाहेर काढण्याचा प्रयत्न केला जातो. मात्र, त्यासाठी एका मुलीचा वापर करण्याचा कट रचला जातो. यानंतर घटनांना भयावह वळण मिळते आणि कथेत अनेक अनपेक्षित घडामोडी घडू लागतात.प्रीतम एस. के. पाटील यांनी या चित्रपटाचे दिग्दर्शन केले आहे. चित्रपटात कुशल बद्रिके, संदिप पाठक, देवदत्त नागे, शशांक शेंडे आणि स्मिता पायगुडे यांसारखे कलाकार महत्त्वाच्या भूमिकांमध्ये आहेत. ‘घबाडकुंड’ १९ जून २०२६ रोजी प्रदर्शित झाला होता. चित्रपटाला IMDbवर दहापैकी ७.५ रेटिंग मिळाले आहे.थिएटरमधील प्रदर्शनानंतर आता प्राइम व्हिडीओवर उपलब्ध झाल्याने ‘घबाडकुंड’कडे प्रेक्षकांचे लक्ष वेधले गेले आहे. महाराष्ट्राच्या लोककथेला रहस्य आणि भयाची जोड देणारी कथा, गूढ विहीर, लपलेला खजिना आणि कथेला वेगळे वळण देणाऱ्या घटना यामुळे हा चित्रपट सध्या ओटीटीवर चर्चेचा विषय ठरत आहे.